மாணவர் முரசு
இ-பேப்பர்
அதிகாரபூர்வமற்ற காவல்துறை செயலி (Police@SG) பற்றி காவல்துறையில் புகார் தெரிவிக்கப்பட்டு உள்ளது.
அந்தப் போலி செயலி, மூன்றாம் தரப்பு செயலி இணையத்தளம் ஒன்றில் இடம்பெற்று இருந்தது. இந்த விவகாரம் பற்றி தனக்குத் தெரியும் என்று காவல்துறை நேற்று ஃபேஸ்புக் பதிவில் குறிப்பிட்டது.
கூகல் பிளே ஸ்டோர், ஆப்பிள் ஸ்டோர் போன்ற அதிகாரபூர்வமான தளங்களில் இருந்து காவல்துறை செயலியைப் பதிவிறக்கம் செய்துகொள்ளும்படி பொதுமக்களுக்கு அது நினைவூட்டியது.
இதன் தொடர்பில் விவரம் கேட்டபோது, புகார் தாக்கலாகி இருப்பதாகவும் அந்த விவகாரம் பற்றி ஆராயப்பட்டு வருவதாகவும் காவல்துறை கூறியதாக ஸ்ட்ரெய்ட்ஸ் டைம்ஸ் நேற்று தெரிவித்தது.
கைப்பேசி போன்ற சாதனத்தில் இடைவிடாமல் வருகின்ற வேண்டுகோள் தகவல்களுக்குச் செவிசாய்த்து அனுமதி கொடுத்துவிட வேண்டாம் என்றும் இதன் தொடர்பில் விழிப்புடன் இருந்துகொள்ளும்படியும் மக்களுக்கு அது ஆலோசனை கூறியது.
புதிய பாணி மோசடி தலைகாட்டி இருப்பதாக இந்த வாரத் தொடக்கத்தில் காவல்துறை எச்சரித்து இருந்தது.
ஒருவர் போலியான 'ஸ்கேம்ஷீல்டு' செயலியைப் பதிவிறக்கம் செய்யும்போது அவரின் சாதனத்தில் இடையூறுகளை ஏற்படுத்தக்கூடிய மென்பொருள்கள் புகுந்துவிடும். ஆகையால் மிகவும் எச்சரிக்கையாக இருந்துகொள்ளும்படி அது மக்களைக் கேட்டுக்கொண்டது.
இந்த வகை மோசடியில், ஃபேஸ்புக் போன்ற சமூக ஊடகத்தளங்களில் காணப்படும் உணவுப்பொருள் விளம்பரங்களைப் பார்க்கும் பொதுமக்கள், தங்களை அறியாமல் வாட்ஸ்அப் செயலி வழியாக மோசடிப் பேர்வழிகளைத் தொடர்புகொண்டு அவற்றை வாங்க முயல்வார்கள்.
அந்த அப்பாவிகளுக்கு ஒரு இணைப்பு முகவரி வரும். அதைப் பயன்படுத்தி ஒரு செயலியைப் பதிவிறக்கம் செய்து அதன்மூலம் பணத்தைச் செலுத்தும்படி மோசடிக்காரர்கள் கேட்டுக்கொள்வர்.
பிறகு அவர்கள் அப்பாவி மக்களின் வங்கிக் கணக்கில் இருந்து அல்லது கடன் அட்டைகளில் இருந்து அங்கீகாரம் இல்லாமல் பணத்தை எடுத்துவிடுவார்கள்.
அப்படி செய்துவிட்டு மோசடிப்பேர்வழிகள் அப்பாவி மக்களைத் தொடர்புகொண்டு தங்களை வங்கி அதிகாரிகள் போல அறிமுகப்படுத்திக்கொண்டு பேசுவார்கள்.
ஸ்கேம்ஷீல்டு செயலியை கூகல் பிளே ஸ்டோரில் இருந்து பதிவிறக்கம் செய்யாதீர்கள் என்று சொல்வார்கள்.
தாங்கள் அனுப்பும் ஒரு முகவரியில் இருந்து செயலியைப் பதிவிறக்கம் செய்துகொள்ளும்படி மோசடி பேர்வழிகள் மக்களைக் கேட்டுக்கொள்வார்கள்.
அப்படி மோசடிக்காரர்கள் பதிவிறக்கம் செய்துகொள்ளும்படி சொல்லும் செயலிகள் போலிச் செயலிகளாக இருக்கும்.
ஸ்கேம்ஷீல்டு செயலி என்பது மோசடிகளில் இருந்து தப்பிக்க உதவும் ஒரு செயலி ஆகும். அதை பதிவிறக்கம் செய்து வைத்திருந்தால் மோசடிச் செய்திகளை அது தடுத்துவிடும்.
சட்டவிரோத காரியங்களில் பயன்படுத்தப்படும் தொலைபேசி எண்கள் மூலம் அழைப்பு வந்தால் அத்தகைய அழைப்புகளை அது துண்டித்துவிடும்.