மாணவர் முரசு
இ-பேப்பர்
உலகப் பொருளியலிலிருந்து சீனாவை நீக்கவில்லை, மாறாக அதன் தொடர்பிலான அபாயக்கூறுகளை நீக்குவதாகக் கூறி செயல்படுவது உலகப் பொருளியலை சிதறிடித்துவிடும் என்றும் உலகப் பொருளியல் துண்டாக்கப்படும், துண்டிக்கப்படும் என்று துணைப் பிரதமர் லாரன்ஸ் வோங் தெரிவித்துள்ளார்.
"விரிவான பொருளியல் தொடர்புகளைப் பாதிக்காமல் தங்களுக்கு பாதகமான அபாயக்கூறுகளை நீக்குவதாகக் கூறி, ஒரு குறிப்பிட்ட உத்திபூர்வ பகுதிகளுக்கு மட்டும் நன்மை பயப்பதாகப் பார்ப்பது மிகக் கடினம்.
"அபாயக்கூறுகளை நீக்கும் நடவடிக்கைகளைப் பெரிய அளவில் மேற்கொண்டால் அவை, எதிர்பாராத எதிர்விளைவுகளை உண்டு பண்ணும். காலப்போக்கில் அதனால் உலகப் பொருளியல் துண்டாக்கப்படும், துண்டிக்கப்படும்," என்று திரு வோங் எச்சரித்தார்.
வர்த்தக தலைவர்கள், கல்வியாளர்கள், ஊடகவியலாளர்கள் ஆகியோர் பங்கேற்ற 'ஆசியாவின் எதிர்காலம்' எனும் தலைப்பிலான நிக்கே கருத்தரங்கில் பேசிய திரு வோங், கடந்த வாரம் ஜப்பானின் ஹிரோஷிமா நகரில் நடைபெற்ற ஜி7 உச்சநிலைக் கூட்டத்தில் தலையெடுத்த புதிய மொழியான 'டி-ரிஸ்கிங்' பற்றி பேசினார்.
தலைவர்கள் 'டி-ரிஸ்கிங்' அதாவது அபாயக்கூறுகளை நீக்குவது எனும் சொல்லை தங்கள் கூட்டறிக்கையில் முதன் முதலாகப் பயன்படுத்தினார்கள். முன்பு இதைக் குறிக்க 'டிகப்லிங்' அதாவது துண்டித்தல் எனும் சொல்லைத் தலைவர்கள் பயன்படுத்தினார்கள்.
"சீனாவுக்கு கேடு விளைவிப்பது அல்லது சீனாவின் வெற்றிகரமான பொருளியலுக்கும் மேம்பாட்டுக்கும் பாதகத்தை ஏற்படுத்துவது எங்கள் கொள்கையின் அணுகுமுறையல்ல. நாங்கள் அவற்றைத் துண்டிக்க விரும்பவில்லை. அதேவேளையில், பொருளியல் மீட்சிக்கு அபாயக்கூறுகளை நீக்குவதும் பொருளியலை பல்வகைப்படுத்துவதும் அவசியம் என்பதையும் நாங்கள் அங்கீகரிக்கிறோம்," என்றும் ஜி7 அறிக்கை கூறுகிறது.
அபாயக்கூறுகளை நீக்குவதற்கும் துண்டித்தலுக்கும் வேறுபாடு உள்ளது. அபாயக்கூறுகளை நீக்குவது என்பது விநியோகச் சங்கிலியில் மற்றவர்களை அளவுக்கு அதிகமாக சார்ந்திருப்பதைக் குறைப்பது என்று பொருள்படும் என்றும் ஜி7 அறிக்கையில் குறிப்பிடப்பட்டுள்ளது. சீனா இந்த அறிக்கையைக் கண்டித்தது.
"நாடுகளும் நிறுவனங்களும் ஏன் அபாயக்கூறுகளை நீக்குவதையும் பல்வகைப்படுத்துதல் அணுகுமுறையையும் நாடுகின்றன என்று புரிந்துகொள்ள முடிகிறது. மூலப் பொருள்கள், முக்கியமான உதிரி பாகங்கள், தொழில்நுட்பம் ஆகியவற்றுக்கு ஒரு குறிப்பிட்ட விநியோகிப்பாளரை அதிகம் நாடியிருக்க யாரும் விரும்பமாட்டார்கள்," என்றும் திரு வோங் விவரித்தார்.
"துண்டு துண்டாகப் பிரிந்திருக்கும் உலகப் பொருளியல் உலக நாடுகளைப் போட்டிபோடும் வட்டாரக் குழுமங்களாகப் பிரித்துவிடும். இதனால், வெற்றிகரமான நமது பொருளியலுக்கு உதவி வரும் அம்சங்களான முதலீடுகள், வர்த்தகம், ஒருங்கிணைந்த சிறந்த யோசனைகள் போன்றவற்றைக் குறைத்து, பாதகமான விளைவுகளை அதிகமாக்கும்," என்றும் துணைப் பிரதமர் வோங் தெரிவித்தார்.