மாணவர் முரசு
இ-பேப்பர்
குடும்பப் பின்னணி எதுவானாலும் ஒவ்வொரு மாணவருக்கும் ராஃபிள்ஸ் கல்வி நிலையம் வாய்ப்பும் நம்பிக்கையும் தரும் ஒரு கலங்கரை விளக்கமாக தொடர்ந்து இருக்க வேண்டும் என்று பிரதமர் லீ சியன் லூங் தெரிவித்துள்ளார். நேற்று நடைபெற்ற பள்ளியின் இருநூற்றாண்டு நிறைவு நிகழ்வில் திரு லீ சார்பாக உரை நிகழ்த்திய கல்வி அமைச்சர் சான் சுன் சிங் இவ்வாறு கூறினார்.
"சிங்கப்பூர் சிறந்த பள்ளிகளைக் கொண்டுள்ள நிலையில் ராஃபிள்ஸ் கல்வி நிலையத்தில் மாணவராக சேர்வதும் சிறந்த கல்விக்கு இட்டுச் செல்லும் பாதைகளில் ஒன்று," என்று தமது உரையில் திரு லீ குறிப்பிட்டிருந்தார். பள்ளிக் கட்டணத்தைச் செலுத்த முடியாத காரணத்தாலோ மற்றவர்களுடன் நட்புகொள்ள முடியாத காரணத்தாலோ திறமைவாய்ந்த மாணவர்கள் எவரும் ராஃபிள்ஸ் கல்வி நிலையத்தில் சேரும் வாய்ப்பை இழந்துவிடக்கூடாது என்றும் அவர் குறிப்பிட்டார்.
சில நாள்களுக்கு முன் கொவிட்-19 கிருமித்தொற்றால் பிரதமர் லீ பாதிக்கப்பட்டதை அடுத்து, நேற்றைய நிகழ்வில் அவர் கலந்துகொள்ளவில்லை. இருப்பினும், தமது ஃபேஸ்புக் பக்கத்தில் வாழ்த்து தெரிவிக்கும் பதிவு ஒன்றை நேற்று அவர் வெளியிட்டிருந்தார்.
சிங்கப்பூர் எக்ஸ்போவில் நடைபெற்ற நிகழ்வில் ஏறத்தாழ 5,000 பேருடன் ராஃபிள்ஸ் கல்விநிலையத்தின் முன்னாள் மாணவர்களான துணைப் பிரதமர் ஹெங் சுவீ கியட், தேசிய வளர்ச்சி அமைச்சர் டெஸ்மண்ட் லீ மற்றும் முன்னாள் பிரதமர் கோ சோக் டோங் ஆகியோரும் கலந்துகொண்டனர்.
பல்வேறு குடும்பப் பின்னணிகளைச் சேர்ந்த தலைசிறந்த மாணவர்களை ஈர்க்கும் வகையில் பள்ளி செயல்பட வேண்டும் என்றும் அந்த மாணவர்கள் சிறந்து விளங்கும் வாய்ப்பையும் சேவையாற்றும் ஊக்கத்தையும் பெற வேண்டும் என்றும் பிரதமர் லீ தமது உரையில் சுட்டினார்.
இதுவரை வசதிகுறைந்த குடும்பங்களைச் சேர்ந்த 3,700க்கும் மேற்பட்ட மாணவர்களுக்கு 'ராஃபிள்ஸ் உபகாரச் சம்பளம்' வழங்கப்பட்டுள்ளதாக அறியப்படுகிறது.
அண்மையில் அதன் நேரடிப் பள்ளி நுழைவுச் சேர்க்கைத் திட்டத்தை ராஃபிள்ஸ் கல்வி நிலையம் விரிவுபடுத்தியதை அடுத்து கல்விசார்ந்த மதிப்பெண்களில் மட்டுமல்லாது விளையாட்டுகள், கலைகள், தலைமைத்துவம் போன்ற அம்சங்களிலும் சிறந்து விளங்கும் மாணவர்களைப் பள்ளி அங்கீகரித்துள்ளது.
உன்னத நிலையை அடைவதற்குத் தனிப்பட்ட சாதனைகள் மட்டும் போதாது என்று குறிப்பிட்ட பிரதமர் லீ, சமுதாயத்திற்கும் மாணவர்கள் பங்களிக்க வேண்டும் என்று வலியுறுத்தினார்.