மாணவர் முரசு
இ-பேப்பர்
கொவிட்-19 தடுப்பூசிச் சேவைகளுக்கு இனி முன்பதிவு தேவை இல்லை
ஜூலை 1 முதல் கொவிட்-19 தடுப்பூசிகள் எட்டு பலதுறை மருந்தகங்களில் மட்டுமே கிடைக்கப்பெறும். அவற்றில் 12 அல்லது அதற்கு மேற்பட்ட வயதுடையோருக்கு ஃபைசர் பயோன்டெக்கின் கொமிர்னாட்டி தடுப்பூசி வழங்கப்படும்.
சில மருந்தகங்களில், 5 வயதுக்கும் 11 வயதுக்கும் இடைப்பட்டவர்கள் கொமிர்னாட்டி தடுப்பூசியைப் போட்டுக்கொள்லலாம். 6 மாதத்துக்கும் 4 வயதுக்கும் இடைப்பட்டவர்களுக்கு மொடர்னாவின் ஸ்பைக்வெக்ஸ் தடுப்பூசி வழங்கப்படும் என்று சுகாதார அமைச்சு தெரிவித்தது.
கொவிட்-19 தடுப்பூசிகளைப் பெற விரும்புவோர் இனி முன்பதிவு செய்யவேண்டியதில்லை.
தகுதிபெறுவோர் ஜூலை 1 முதல் 8 பலதுறை மருந்தகங்களில் எதில் வேண்டுமானாலும் தடுப்பூசியைப் போட்டுக்கொள்ளலாம்.
புக்கிட் பாத்தோக், யூனோஸ், கேலாங், காலாங், பைனியர், பொங்கோல், தெம்பனிஸ், உட்லண்ட்ஸ் ஆகியவற்றில் அமைந்துள்ள பலதுறை மருந்தகங்கள் அந்தச் சேவையை வழங்கும்.
பலதுறை மருந்தகங்களில் தடுப்பூசிச் சேவைகளை முறைப்படுத்தும் நோக்கில் இந்த நடவடிக்கை மேற்கொள்ளப்படுகிறது.
கொவிட்-19 வழக்கமான தொற்றாகி, தடுப்பூசிக்கான தேவை நிலையாகிவரும் வேளையில் வளங்களை மிகச் சிறந்த வகையில் பயன்படுத்துவது நோக்கம்.
கொவிட்-19 கிருமித்தொற்றிலிருந்து பாதுகாக்க, தடுப்பூசி முக்கியம் என்பதால் தகுதிபெறும் அனைவரும் தடுப்பூசி போட்டுக்கொள்ளுமாறு ஊக்குவிக்கப்படுகின்றனர்.
கொவிட்-19 நோய் தொற்றினால், கடுமையான பாதிப்பில் இருந்தும் மருத்துவமனையில் தங்கி சிகிச்சை பெறுவதிலிருந்தும் பாதுகாத்துக்கொள்ள, 60 அல்லது அதற்கு மேற்பட்ட வயதுடைய மூத்தோரும் எளிதில் பாதிக்கப்படக்கூடியோரும் தாங்கள் கடைசியாகக் கூடுதல் தடுப்பூசி போட்டுக்கொண்ட ஓராண்டுக்குப் பிறகு ஆக அண்மைய இருவகை ஆற்றல் தடுப்பூசியைப் போட்டுக்கொள்ளப் பரிந்துரைக்கப்படுகின்றனர்.
தகுதிபெறுவோர் கொவிட்-19 தடுப்பூசியைப் பெற்றுக்கொள்ள, பலதுறை மருந்தகங்களைத் தவிர ஒன்பது கூட்டுச் சோதனை, தடுப்பூசி நிலையங்களில் ஏதேனும் ஒன்றுக்கு நேரடியாகச் செல்லலாம் அல்லது பங்கேற்கும் பொதுச் சுகாதார ஆயத்தநிலை மருந்தகத்தைத் தொடர்புகொண்டு முன்பதிவுசெய்த பின்னர் மருந்தகத்திற்குச் செல்லலாம்.
தடுப்பூசி வழங்கும் அருகில் உள்ள இடத்தைப் பற்றியும் அதன் செயல்பாட்டு நேரங்களைப் பற்றியும் தெரிந்துகொள்ள குடியிருப்பாளர்கள் gowhere.gov.sg/vaccine எனும் இணையத்தளத்தை நாடலாம்.