வேலை தேடிய வெளிநாட்டினரை ஏமாற்றிய வழக்கில் ஆடவருக்குக் கூடுதல் சிறைத் தண்டனை

வேலை தேடிய வெளிநாட்டினர் 832 பேர் சம்பந்தப்பட்ட வழக்குடன் தொடர்புடைய நிறுவன இயக்குநர் புதன்கிழமை 178 குற்றச்சாட்டுகளை ஒப்புக்கொண்டதைத் தொடர்ந்து, அவர் கூடுதல் காலம் சிறையில் இருக்க வேண்டும். வேலை தேடிய அந்த நபர்கள் $600,000க்குமேல் இழந்தனர்.

கிளரென்ஸ் லிம் ஜுன் யாவ்வுக்கும் அவருக்கு உடந்தையாக இருந்த டெரி டான் சூவுக்கும் எதிரான குற்றம் 2019ல் நிரூபணமானது.

லிம்முக்கு ஐந்து ஆண்டு, ஆறு மாதச் சிறைத் தண்டனை விதிக்கப்பட்டு, இழப்பீடாக $174,385 வழங்க 2021ல் உத்தரவிடப்பட்டிருந்தது.

வெளிநாட்டு ஊழியர் வேலை நியமனச் சட்டத்தின்கீழ் 178 குற்றச்சாட்டுகளை அவர் புதன்கிழமை ஒப்புக்கொண்டதைத் தொடர்ந்து அவருக்கு நான்கு மாதச் சிறைத் தண்டனை விதிக்கப்பட்டது.

வேலை தேடிய வெளிநாட்டினர் செலுத்தியிருந்த $300,000க்கு மேற்பட்ட கட்டணத்துடன் இந்தக் குற்றச்சாட்டுகள் தொடர்புடையவை. லிம்முக்கு முன்னதாக விதிக்கப்பட்டிருந்த சிறைத் தண்டனையை நிறைவேற்றிய பிறகு இப்போது விதிக்கப்பட்டுள்ள தண்டனையை அவர் ஆற்றத் தொடங்குவார்.