கோடரியுடன் ஆசாமி; சிறை, பிரம்படி

ஸ்டாம்பர்ட் ரோட்டில் இந்த ஆண்டு தொடக்கத்தில் கையில் கோடரியுடன் காவல்துறை அதிகாரிகளை நெருங்கிய ஓர் ஆடவருக்கு வெள்ளிக்கிழமை ஆறு மாதம் 14 வாரச் சிறைத்தண்டனை விதிக்கப்பட்டது. ஆறு பிரம்படிகள் கொடுக்கும்படி உத்தரவிடப்பட்டது.

அந்தச் சம்பவம் காணொளியில் பதிவாகி சமூக ஊடகத்தில் பதிவேற்றப்பட்டது.

மனோகர் திருநாவுக்கரசு என்ற அந்த 26 வயது சிங்கப்பூரர் ஐந்து குற்றச்சாட்டுகளின் பேரில் குற்றத்தை ஒப்புக்கொண்டார். இதர மூன்று குற்றச்சாட்டுகள் கவனத்தில் எடுத்துக்கொள்ளப்பட்டன.

மனோகர் சம்பவம் நிகழ்ந்தபோது வீடற்றவராக இருந்தார் என்றும் தன்னுடைய பாதுகாப்பிற்காக அவர் அந்தக் கோடரியை வைத்திருந்தார் என்றும் விசாரணையின்போது தெரிவிக்கப்பட்டது.

கோடரியை அவர் சைனாடவுனில் $11 கொடுத்து வாங்கினார்.

ஏப்ரல் 11ஆம் தேதி அதிகாலை நேரத்தில் அந்த ஆடவர் மதுபானம் குடித்திருந்தார். ஸ்டாம்பர்ட் ரோடு பகுதியில் முதியவர்கள் சிலர் 30 வயது மதிக்கத்தக்க ஒரு மாதுடன் இருந்ததைக் கண்ட மனோகர், அந்த மாதிடம் போய் அந்த இடத்தைவிட்டுச் சென்றுவிடுமாறும் இல்லை எனில் ஆபத்து ஏற்படும் என்றும் கூறினார்.

ஆனால், அந்த மாது மறுத்துவிட்டார். அப்போது அங்கிருந்த ஆடவர்களில் ஒருவர் மனோகரை என்ன விவரம் என்று கேட்டு அவரை விலக்கிவிட்டார்.

அப்போது மனோகர் அந்த ஆடவரை தலையில் பலமுறை குத்தினார். முதியவர் ஒருவர் இளம் வயது மாதுடன் இருப்பது பொருத்தமற்றது என்று மனோகர் கருதினார்.

தொடர்புடைய செய்திகள்

கோடரித் தாக்குதல்: ஆடவர்மீது குற்றச்சாட்டு

அவர் தாக்கியதால் அந்த முதியவருக்குக் காயம் ஏற்பட்டது. அதே நாளன்று பின்நேரத்தில் மனோகர் கைதானார். அப்போது காவல்துறை அதிகாரியை திட்டினார். மூர்க்கமாக நடந்துகொண்டார்.

கையில் கோடரியுடன் காவல்துறை வாகனம் ஒன்றை நோக்கி நடந்து சென்றார். இரண்டு அதிகாரிகள் தங்கள் ஆயுதத்தை எடுத்து மனோகரை நோக்கி நீட்டினர். அப்போது காவல்துறை அதிகாரிகளை நெருங்காமல் கொஞ்சம் தொலைவிலேயே நின்றுகொண்டு கோடரியை மனோகர் தரையில் போட்டுவிட்டார் என்று நீதிமன்ற விசாரணையில் தெரிவிக்கப்பட்டது.