மாணவர் முரசு
இ-பேப்பர்
புதுப்பிக்கத்தக்க எரிசக்தியில் அடுத்த ஐந்து ஆண்டுகளில் 10.5 பில்லியன் வெள்ளி முதலீடு செய்யப்படும் என்று செம்ப்கார்ப் இண்டஸ்டிரிஸ் அறிவித்துள்ளது.
தனது புதுப்பிக்கத்தக்க எரிசக்தி ஆற்றலுக்கான வளர்ச்சி எதிர்காலத்தில் அதிகரிக்கும் என அந்நிறுவனம் எதிர்பார்க்கிறது. மேலும் 2028ஆம் ஆண்டுக்குள் கரிம வெளியேற்றத்தை பாதியாகக் குறைக்கவும் அது திட்டமிட்டுள்ளது.
இந்த 10.5 பில்லியன் வெள்ளி முதலீடு, 2024 முதல் 2028 வரையிலான மொத்த முதலீட்டில் 75 விழுக்காடாகும்.
எஞ்சிய முதலீட்டில் பத்து விழுக்காடு அதன் ஹைட்ரஜன் தொடர்பான சொத்திலும் பத்து விழுக்காடு கரிம வெளியேற்றம் அல்லாத தீர்வுகளுக்கும் ஐந்து விழுக்காடு அதன் ஒருங்கிணைக்கப்பட்ட நகர்ப்புற தீர்வுகளுக்கும் பயன்படுத்தப்படும்.
தற்போது செம்ப்கார்ப்பின் புதுப்பிக்கத்தக்க எரிசக்தியின் ஆற்றல் 12 கிகாவாட்ஸ் ஆகும்.
2028ஆம் ஆண்டில் எரிசக்தி ஆற்றலை 25 கிகாவாட்சுக்கு அதிகரிப்பது செம்ப்கார்ப்பின் இலக்காகும்.
இதற்கிடையே இந்தக் குழுமம், 2025ஆம் ஆண்டில் மணிக்கு ஒரு மெகாவாட்டுக்கு 0.4 டன் கார்பன் டைஆக்சைடு என்ற இலக்கை அடைந்துள்ளது.
புதுப்பிக்கத்தக்க எரிசக்தியில் அதன் வளர்ச்சிக்கு நிதியளிப்பதற்காக எரி வாயுவை மாற்றத்திற்கான எரிபொருளாகப் பயன்படுத்துவது தொடரும் என்று செம்ப்கார்ப் கூறியது.
மேலும் குறைந்த கரிம எரிசக்தி, குறைந்த கரிம மூலப்பொருட்கள் மற்றும் கரிம மேலாண்மை ஆகியவற்றில் தனது நிலையை ஆதரிக்கும் ஆற்றல்களில் முதலீடு செய்யவும் அது திட்டமிட்டுள்ளது.
