மாணவர் முரசு
இ-பேப்பர்
செயற்கை நுண்ணறிவு நமக்கு நன்மை பயக்கக்கூடியது என்பது மட்டுமல்ல, அது பற்றி மக்கள் தெரிந்துகொள்ள வேண்டியது அவசியம் என்று துணைப் பிரதமர் லாரன்ஸ் வோங் கூறியுள்ளார்.
உலக நாடுகளுடன் நடைபெறும் போட்டா போட்டியில் சிங்கப்பூரை முன்னுக்குக் கொண்டு செல்லும் பணியில் அறிவிக்கப்பட்ட புதிய செயற்கை நுண்ணறிவு உத்தியை அவர் டிசம்பர் 4ஆம் தேதி அறிவித்தபோது மேற்கண்டவாறு தெரிவித்தார்.
“அறிவாற்றல் அடிப்படையில் அமைந்துள்ள ஆராய்ச்சி, நிரலிடுதல், எழுத்துப் படைப்பு போன்றவை இடையூறுகளின்றி பாதுகாப்பாக இருக்கும் என கடந்த காலத்தில் கருதப்பட்டது. அந்த நிலை மாறிவிட்டது,” என்று அவர் அண்மையில் செயற்கை நுண்ணறிவில் ஏற்பட்டுள்ள புதிய கண்டுபிடிப்புகள் குறித்துக் கூறினார்.
குறிப்பிட்டுக் கூறவேண்டுமாயின், ‘சாட்ஜிபிடி’ போன்ற எழுத்து, சித்திரங்கள், மேம்பட்ட செயற்கை நுண்ணறிவு உருவாக்கம் ஏறக்குறைய மானிட அறிவுக்கு நிகரான ஆற்றலை இணையத்தள தொடர்பிலுள்ள ஒருவரின் கைகளில் சேர்த்துள்ளது என்று துணைப் பிரதமர் வோங் விளக்கினார்.
செயற்கை நுண்ணறிவுப் பயன்பாடு திக்குத் தெரியாத காட்டில் நுழைவது போன்றது என்ற திரு வோங், பொதுமக்கள் நன்மைக்காக அதன் பயன்படுத்துவதில் ஒரு திட்டமிட்ட அணுகுமுறையைக் கடைப்பிடிக்க வேண்டும் என்று தெரிவித்தார்.
அதே வேளையில், வேலை வாய்ப்புகள், மக்கள் வாழ்வாதாரம் போன்ற அம்சங்கங்களில் அதன் தாக்கத்தைக் குறைக்கவும் வேண்டும் என்று அவர் விளக்கினார்.
சிங்கப்பூரின் இந்தப் புதிய உத்திக்கு ‘நேஷனல் ஏஐ ஸ்ட்ரேடஜி 2:0’ எனப் பெயரிடப்பட்டுள்ளது. இதன் மூலம் திறன் வளர்ச்சி, துடிப்பான செயற்கை நுண்ணறிவு உருவாக்கம் போன்றவற்றை முன்னெடுத்துச் செல்வதுடன், பொதுமக்கள் நன்மைக்காக, அவற்றை உலக முதன்மைத் தர கட்டமைப்புடனும் ஆய்வுடனும் கட்டிக்காப்பது நமது இலக்கு என்று துணைப் பிரதமர் வோங் விவரித்தார்.
