குடும்ப வாழ்க்கை, தொழில் ஆகியவற்றில் கவனம் செலுத்த பாட்டாளிக் கட்சியிலிருந்து விலகியுள்ளார் டெரன்ஸ் டான்.
இவர் பாட்டாளிக் கட்சி சார்பாக பொதுத் தேர்தலில் இருமுறை போட்டியிட்டவர்.
2015ஆம் ஆண்டில் மரின் பரேட் குழுத் தொகுதியிலும் 2020ஆம் ஆண்டில் ஈஸ்ட் கோஸ்ட் குழுத் தொகுதியிலும் அவர் களமிறங்கி தோற்றார்.
53 வயது திரு டான், செங்காங் குழுத் தொகுதி நாடாளுமன்ற உறுப்பினர் ஹி டிங் ருவின் கணவர் என்பது குறிப்பிடத்தக்கது.
ஜனவரி மாதத்தில் பாட்டாளிக் கட்சியிலிருந்து விலகியதாகவும் கட்சித் தலைவர்கள் புரிந்துணர்வுடன் அதை ஏற்றுக்கொண்டதாகவும் அவர் கூறினார்.
திரு டானுக்கும் அவரது மனைவிக்கும் மூன்று மகன்கள் உள்ளனர். மூவரும் ஏழு வயதுக்கும் குறைவானவர்கள்.
“எனது மனைவிக்கு ஆதரவு வழங்கவும் பிள்ளைகளுடன் கூடுதல் நேரம் செலவழிக்கவும் தொழிலை மேம்படுத்தவும் கட்சியிலிருந்து விலகியுள்ளேன்,” என்றார் திரு டான்.