சிங்கப்பூர் நாணய ஆணையத்தின் இயக்குநர் வாரியத்தில் போக்குவரத்து அமைச்சர்

போக்குவரத்து அமைச்சர் சீ ஹொங் டாட் சிங்கப்பூர் நாணய ஆணையத்தின் இயக்குநர் வாரியத்தில் சேர்க்கப்பட்டுள்ளார்.

அவரது பதவிக்காலம் மூன்று ஆண்டுகள் என்றும் அது ஜூன் 1ஆம் தேதி தொடங்கும் என்றும் சிங்கப்பூர் நாணய ஆணையம் வியாழக்கிழமை (மே 2) அன்று அறிக்கை மூலம் தகவல் வெளியிட்டது.

திரு சீ நிதியமைச்சின் இரண்டாவது அமைச்சராகவும் உள்ளார்.

ஆணையத்தின் இயக்குநர் வாரியத்தில் உள்ள துணைப் பிரதமர் , பொருளியல் கொள்கைகளுக்கான ஒருங்கிணைப்பு அமைச்சர் ஹெங் சுவீ கியெட், கலாசார, சமூக, இளையர், வர்த்தக, தொழில் துணையமைச்சர் ஆல்வின் டான் உள்ளிட்ட ஐந்து உறுப்பினர்களின் பதவி மேலும் மூன்று ஆண்டுகளுக்கு நீட்டிக்கப்பட்டுள்ளது.

சிங்கப்பூர் தேசிய பல்கலைக்கழகத்தின் முன்னாள் தலைவர் பேராசிரியர் டான் சோர் சுவான் மே 31ஆம் தேதியுடன் இயக்குநர் வாரியத்தில் இருந்து வெளியேறுகிறார்.

12 ஆண்டுகளுக்கு மேலாக இயக்குநர் வாரியத்தில் இருந்த டான் பல நேரங்களில் சிறப்பான முடிவுகளை எடுக்க உதவியவர் என்று ஆணையத்தின் இயக்குநர் வாரியத்தின் தலைவராக உள்ள துணைப் பிரதமரும் நிதியமைச்சருமான லாரன்ஸ் வோங் தெரிவித்தார்.