நோயாளியின் புகாரை மறுத்த டான் டோக் செங் மருத்துவமனை

பெண் நோயாளி ஒருவர் தாம் டான் டோக் செங் மருத்துவமனையில் சிகிச்சையின்போது தவறாக நடத்தப்பட்டதாகச் சமூக ஊடகத்தில் குற்றஞ்சாட்டினார். அதை மறுக்கும் வகையில் மருத்துவமனை செவ்வாய்க்கிழமை (அக்டோபர் 21) அறிக்கை வெளியிட்டுள்ளது.  “எங்கள் மருத்துவமனையில் சேர்க்கப்பட்ட நோயாளி ஒருவர் சிகிச்சையின்போது தவறாக நடத்தப்பட்டதாகச் சமூக ஊடகத்தில் குறைகூறியிருந்தார். இந்தக் குற்றச்சாட்டை நாங்கள் கடுமையாகப் பார்க்கிறோம்,” என்று டான் டோக் செங் மருத்துவமனை ஃபேஸ்புக் பக்கத்தில் பதிவிட்டது.  “எங்கள் மருத்துவ ஊழியர்களும் பிற ஊழியர்களும் நோயாளியின் பாதுகாப்பையும் உடல் நலத்தையும் கருத்தில் கொண்டு விதிமுறைகள்படி நடந்துகொண்டனர். சிகிச்சையின்போது ஊழியர்கள் வேகமாகவும் பொறுப்புடனும் நடந்துகொண்டனர்,” என்றும் அது குறிப்பிட்டது.  அக்டோபர் 10ஆம் தேதி மருத்துவமனையில் சிகிச்சைக்காகச் சேர்க்கப்பட்டிருந்தபோது தம்மை வற்புறுத்தி ஏதோ ஒரு தெரியாத மருந்தை உடலுக்குள் மருத்துவர்கள் செலுத்தினர் என்று அப்பெண் குற்றஞ்சாட்டினார்.

மேலும் இச்சம்பவம் குறித்து தமது கணவருக்குத் தகவல் சொல்ல மருத்துவமனை அனுமதிக்கவில்லை என்றும் அவர் கூறினார். தனது விருப்பம் இல்லாமல் மனநலக் கழகத்திற்கு மருத்துவர்கள் அனுப்பியதாகவும் அப்பெண் குறிப்பிட்டார்.  மருத்துவ ஊழியர்கள், துணைக் காவல்படை அதிகாரிகள் என 10 பேர் தன்னை தவறாக நடத்தியதாக அப்பெண் பதிவிட்டார். அக்டோபர் 18ஆம் தேதி அப்பெண் காவல்துறையில் புகார் கொடுத்தார்.