இளையர், அடித்தள, குடிமைச் சமூகத்தினரிடையே சமூகத் தலைவர்களை உருவாக்க இரு திட்டங்கள்

சமூகத் தலைவர்கள் தங்களின் தலைமைத்துவத் திறன்களை வளர்த்துக்கொள்ளவும், தங்களின் கண்ணோட்டங்களை விரிவுபடுத்தவும் அதிக வாய்ப்புகளை வழங்க வகை செய்யும் இரண்டு புதிய திட்டங்கள் அறிமுகப்படுத்தப்படவிருக்கின்றன.

தேசிய சமூகத் தலைமைத்துவக் கழகம், 2025ஆம் ஆண்டில் வெளிநாட்டு நடவடிக்கைகளில் ஈடுபடும் 10 வார இளையர் தலைமைத்துவத் திட்டத்தை வெளியிடும்.

சமூக, குடிமைச் சமூகத் தலைவர்களுக்காக ஆறு மாத சமூகத் தலைமைத்துவத் திட்டம் நவம்பரில் தொடங்கப்படும்.

செப்டம்பர் 28ஆம் தேதியன்று புவன விஸ்தாவில் உள்ள தேசிய சமூகத் தலைமைத்துவக் கழகத்தின் 60ஆம் ஆண்டு நிறைவு நிகழ்ச்சியில் கலாசார, சமூக, இளையர்துறை அமைச்சர் எட்வின் டோங் இத்திட்டங்களைப் பற்றி விளக்கினார்.

“சமூகமும் இளையர்களின் தலைமைத்துவமும் முக்கியப் பங்கு வகிக்கின்றன. இது நமது சமூகக் கட்டமைப்பின் முதுகெலும்பாக அமைவதால், சமூக ஒற்றுமையை வளர்ப்பது, அடிப்படைத் திட்டங்களை எளிதாக்குவது, நமது சமூகத்தின் உள்ளூர், நுண்ணிய குறிப்பிட்ட தேவைகளைப் பூர்த்தி செய்வது அவசியமாகிறது,” என்றார் அமைச்சர்.

அடுத்த சில பத்தாண்டுகளுக்குச் சிங்கப்பூரை முன்னெடுத்துச் செல்ல, சமூகத் தலைமைத்துவம் மட்டுமின்றி, குடிமைச் சமூகம் மற்றும் தேசியத் தளங்களிலும் வலுவான திறனாளர்களை உருவாக்குவதே இந்தத் திட்டங் களின் நோக்கமாகும் என்று, கிட்டத்தட்ட 290 பங்கேற்பாளர்கள் கலந்து கொண்ட கற்றல் விழாவில் திரு டோங் கூறினார்.

17 முதல் 19 வயதுக்குட்பட்ட 50 பங்கேற்பாளர்களுடன் இளைய தலைவர் திட்டத்தின் முதல் மறுநிகழ்வு மார்ச் மாதம் தொடங்கும்.

இளையர்களின் தலைமைத்துவம், குடிமைப் பங்கேற்பு பற்றி மேலும் அறிந்துகொள்வதற்கு அவர்கள் ஓர் ஆசியான் நாட்டில் ஆழ்ந்த பரிமாற்ற அனுபவத்தைப் பெறுவார்கள்.

தொடர்புடைய செய்திகள்

சமூகப் பிணைப்பு வலுவாக இளையர் உறுதி

சிறந்த செயல்திறன் கொண்டவர்கள், ஆக்ஸ்ஃபர்ட் பல்கலைக்கழகம் அல்லது ஹார்வர்ட் பல்கலைக் கழகத்தில் தலைமைத்துவ பயிற்சிக்கான வாய்ப்பைப் பெறக்கூடும். அவர்களின் உலகளாவிய கண்ணோட்டங்கள், பன்முக கலாசார விழிப்புணர்வை விரிவுபடுத்தலாம் என்றும் திரு டோங் கூறினார்.

சமூகத் தலைமைத்துவத் திட்டத்தில் முதலில் ஏறக்குறைய 40 பேர் பங்கேற்பர்.

இந்தத் திட்டத்தில் இருப்பவர்கள், சிங்கப்பூரை வெளிப்புற கண்ணோட்டத்திலிருந்து பார்ப்பது எப்படி என்பதைப் புரிந்துகொள்ள வெளிநாட்டுக் கல்விப் பயணத்திலும் பங்கேற்பார்கள் என்று அமைச்சர் கூறினார்.

பரிந்துரைக்கப்பட்ட அடித்தளத் தலைவர்கள், குடிமைச் சமூகத் தலைவர்கள், மக்கள் கழகப் பணியாளர்கள் அடங்கிய பங்கேற்பாளர்களின் முதல் தொகுதி ஆறு நாள்களுக்கு சிட்னிக்குச் செல்லும்.

சிங்கப்பூரின் 60வது பிறந்தநாளையும், 2025ல் மக்கள் சங்கத்தின் 65வது பிறந்த நாளையும் நினைவுகூரும் வகையில், புவன விஸ்தாவில் உள்ள தேசிய சமூகத் தலைமைத்துவக் கழக வளாகத்தில் ஒரு புதிய சமூகக் காட்சிக்கூடம் அமைக்கப்படும் என்றும் திரு டோங் அறிவித்தார்.