மாணவர் முரசு
இ-பேப்பர்
‘தி ஆன்லைன் சிட்டிசன்’ (டிஓசி) உடன் இணைக்கப்பட்ட இரண்டு இணையத்தளங்கள், ஜூலை 1ஆம் தேதி முதல், தங்களை ‘அறிவிக்கப்பட்ட இணைய இருப்பிடம்’ (Declared Online Location - DOL) எனக் குறிக்கும் ஓர் அறிவிப்பை வெளியிட வேண்டும்.
இந்தத் தளங்கள் “பொய்களைப் பரப்பும் வரலாற்றைக் கொண்டுள்ளன” என்பதைப் பார்வையாளர்களுக்கு எச்சரிப்பதை இந்த அறிவிப்புகள் நோக்கமாகக் கொண்டுள்ளன என்று தகவல், மின்னிலக்க மேம்பாட்டு அமைச்சு, செவ்வாய்க்கிழமை (ஜூன் 30) வெளியிட்ட ஓர் அறிக்கையில் தெரிவித்துள்ளது.
கடைசியாக ஜூன் 2025ல், டிஓசி தளத்திற்கே ஒரு டிஓஎல் அறிவிப்பு வெளியிடப்பட்டது. இருப்பினும், ஜூன் 30ஆம் தேதி டிஓஎல் வெளியிடப்பட்ட theonlinecitizen.com மற்றும் heidoh.com ஆகிய இரண்டு தளங்களும் வெவ்வேறு இணைய முகவரிகளைக் கொண்டிருப்பதால், அவை அதே விதிமுறைகளுக்கு உட்படுத்தப்படவில்லை.
அதாவது, இணைய விளம்பரங்கள் போன்றவற்றின் மூலம், அந்த இரண்டு இணையத்தளங்களிலும் கட்டண உள்ளடக்கத்தை இயக்குவதன் வழியாக டிஓசி நிதிப் பலன்களைப் பெற முடிந்துள்ளது என்று அந்த அறிக்கை மேலும் கூறியது.
டிஓஎல் அறிவிப்பு நடைமுறையில் இருக்கும் வரை, அந்த இணையத்தளத்தை இயக்குபவர் நிதி ரீதியாகப் பயனடைவதைத் தடுக்கும் வகையில், இணையவழி பொய்ச் செய்திக்கும் சூழ்ச்சித் திறத்திற்கும் எதிரான பாதுகாப்புச் சட்டம் (பொஃப்மா) கீழ் எடுக்கப்படும் நடவடிக்கைகளுக்கு அந்த இரண்டு இணையத்தளங்களும் இணங்க வேண்டும்.
இரு தளங்களிலும் உள்ள டிஓஎல் அறிவிப்புகள், 2028, ஜூன் 30ஆம் தேதி வரை இரண்டு ஆண்டுகளுக்கு நடைமுறையில் இருக்கும்.
மின்னிலக்க விளம்பர நிறுவனங்கள் உள்ளிட்ட சேவை வழங்குநர்கள், இரு தளங்களிலும் உள்ள கட்டண உள்ளடக்கங்கள் சிங்கப்பூரில் கிடைக்கச் செய்யப்படாமல் இருப்பதை உறுதிசெய்ய நடவடிக்கை எடுக்க வேண்டும் என்று அந்த அறிக்கையில் கூறப்பட்டுள்ளது.
தனிநபர்களும் நிறுவனங்களும் அந்த இரு தளங்களுக்கும் நிதி உதவி வழங்குவதற்கும் தடை விதிக்கப்பட்டுள்ளது.
“பொதுமக்கள், டிஓசியுடன் தொடர்புடைய தளங்கள் உட்பட, தவறான தகவல்களைத் தொடர்புகொள்வதற்கான வரலாற்றைக் கவனத்தில் கொள்ளுமாறு கடுமையாக அறிவுறுத்தப்படுகிறார்கள். மேலும் அதிகாரபூர்வ ஆதாரங்களுக்கு எதிராக டிஓசி உடன் இணைந்த டிஓஎல்களில் வெளியிடப்பட்ட தகவல்களின் உண்மைத்தன்மையைச் சரிபார்க்க வேண்டும்,” என்று அமைச்சு தெரிவித்தது.
