மாணவர் முரசு
இ-பேப்பர்
ஐம்பது ஆண்டுகளுக்கும் மேலான பங்காளித்துவத்தை வலுப்படுத்தும் வகையில், சிங்கப்பூரும் வியட்னாமும் விநியோகச் சங்கிலி மீள்திறன், விவசாய வர்த்தகம், உயர்கல்வி போன்ற துறைகளில் ஒத்துழைப்பை வலுப்படுத்தும்.
நான்கு நாள் அரசுமுறைப் பயணமாக சிங்கப்பூர் வந்துள்ள வியட்னாம் அதிபர் டோ லாம், பிரதமர் லாரன்ஸ் வோங் முன்னிலையில், வெள்ளிக்கிழமையன்று (மே 29) இரு நாடுகளும் பல ஒப்பந்தங்களைப் பரிமாறிக்கொண்டன.
“வியட்னாமின் புதிய வளர்ச்சிக் காலத்தில், சிங்கப்பூர் அதற்கு ஒரு நண்பனாகவும் நம்பகமான கூட்டாளியாகவும் இருக்கும்,” என்று அதிபர் தர்மன் சண்முகரத்னம் மே 29ஆம் தேதி கூறினார்.
மனித மூலதனத்திற்கு முன்னுரிமை அளிப்பது, உலகத்துடன் வெளிப்படைத்தன்மையை ஏற்றுக்கொள்வது, தொடர்ச்சியான புதுப்பித்தலுக்கு உறுதியளிப்பது ஆகியவற்றில் இரு நாடுகளும் ஒருமித்த கண்ணோட்டங்களைக் கொண்டுள்ளன என்று ராஃபிள்ஸ் ஹோட்டல் ஜூபிலி அரங்கில் திரு லாமிற்காக ஏற்பாடு செய்திருந்த அரசு விருந்தில் திரு தர்மன் கூறினார்.
இந்தப் பகிரப்பட்ட உள்ளுணர்வுகள், நடைமுறைவாதம், பரஸ்பர மரியாதை, ஒரு நிலையான, திறந்த, செழிப்பான தென்கிழக்கு ஆசிய மற்றும் உலகப் பொருளியலில் உள்ள பொதுவான பங்கு ஆகியவற்றில் வேரூன்றிய ஒரு பங்காளித்துவத்துக்கு இயற்கையான அடித்தளத்தை உருவாக்கியுள்ளன என்றும் அவர் மேலும் கூறினார்.
“உலகம் மறுவடிவம் பெற்று வரும் ஒரு காலகட்டத்தில் நாம் சந்திக்கிறோம். சிங்கப்பூர் மற்றும் வியட்னாம் போன்ற நாடுகளுக்கு, இந்த மாற்றங்கள் வெறும் கற்பனை அல்ல. அவை நமது வாழ்வாதாரங்களையும் நமது பாதுகாப்பையும் நமது அடுத்த தலைமுறையின் எதிர்கால வாய்ப்புகளையும் பாதிக்கின்றன,” என்று திரு தர்மன் கூறினார்.
“எனவே, சிங்கப்பூரும் வியட்னாமும் ஒரே மாதிரியான உத்திபூர்வக் கண்ணோட்டங்களைப் பகிர்ந்துகொள்வது முக்கியமானது,” என்றார் அவர்.
பிரதமர் வோங்கும் திரு லாமும் காலையில், ஆளுமை, சட்டம், தொழில்துறை ஆகிய துறைகளில் இருதரப்பு ஒத்துழைப்பை வலுப்படுத்துவதற்கான பல ஒப்பந்தங்கள் பரிமாறப்படுவதைப் பார்வையிட்டனர்.
தொடர்புடைய செய்திகள்
இதில், இரு தரப்பிலிருந்தும் மூத்த அரசியல் தலைவர்களும் அதிகாரிகளும் ஆளுமை, பொது நிர்வாகம், மாற்றம் குறித்து விவாதிப்பதற்காக ஒரு வழக்கமான உயர்மட்டக் கருத்தரங்கை நிறுவுவதற்கான சிங்கப்பூர்-வியட்னாம் உத்திபூர்வ கலந்துரையாடல் குறித்த ஒப்பந்தமும் இதில் அடங்கும்.
உணவுப் பாதுகாப்பு மற்றும் தரத்தில் ஒத்துழைப்பை வலுப்படுத்தவும் இத்துறையில் ஒருங்கிணைப்பை அதிகரிக்கவும், சிங்கப்பூரும் வியட்னாமும் இரு நாடுகளுக்கும் இடையிலான வேளாண் உணவு வர்த்தகத்திற்காக ஒரு பணிக்குழுவை அமைத்துள்ளன.
மேலும், இது உணவு வர்த்தகத்தைப் பாதிக்கும் தற்போதைய மற்றும் புதிதாக உருவாகும் பிரச்சினைகளையும் கவனத்தில் கொள்ளும்.
வெள்ளிக்கிழமை காலையில், திரு லாம்முக்கு வெளியுறவு அமைச்சில் சடங்குபூர்வ வரவேற்பு அளிக்கப்பட்டது. பின்னர் அவர், திரு தர்மனையும் பிரதமர் வோங்கையும் தனித்தனியாகச் சந்தித்தார்.