ரெட்ஹில் பகுதியில் மரக்கிளை விழுந்து பெண் காயம்

ரெட்ஹில் வட்டாரத்தில் பெண் ஒருவர் மீது மரக்கிளை விழுந்ததில் அவர் காயமடைந்தார்.

அந்தச் சம்பவம் ரெட்ஹில் ஈரச்சந்தை மற்றும் உணவு நிலையத்தின் முன்னால் ஞாயிற்றுக்கிழமை (ஜனவரி 26) காலை நடைபெற்றதாக ‘ஷின் மின் டெய்லி நியூஸ்’ செய்தி வெளியிட்டு உள்ளது.

பெண் மீது விழுந்த மரக்கிளையின் சுற்றளவு கிட்டத்தட்ட 16 சென்டிமீட்டர் இருக்கலாம் என்று கூறப்பட்டது.

அந்தச் சம்பவம் தொடர்பாக சிங்கப்பூர் குடிமைத் தற்காப்புப் படையை ஸ்ட்ரெய்ட்ஸ் டைம்ஸ் தொடர்புகொண்டது.

ரெட்ஹில் குளோஸ் பகுதியில் நடைபெற்ற சம்பவம் குறித்து காலை 9.25 மணியளவில் தங்களுக்கு அழைப்பு வந்ததாக அந்தப் படை கூறியது.

ஒருவர் சிங்கப்பூர் பொது மருத்துவமனைக்குக் கொண்டு செல்லப்பட்டதாகவும் அது தெரிவித்தது.

சம்பவம் நிகழ்ந்த இடத்தில் ரத்தக்கறை படிந்த தாள்கள், சேதமடைந்த கடைப்பொருள் தள்ளுவண்டி (shopping trolley), தக்காளி மற்றும் கேரட் நிறைந்த பிளாஸ்டிக் பை ஆகியவற்றுடன் சீனப் புத்தாண்டு அலங்காரப் பொருள்களும் சிதறிக் கிடந்ததாக ஷின் மின் கூறியது.