மாணவர் முரசு
இ-பேப்பர்
லிட்டில் இந்தியாவின் பஃப்ளோ ரோட்டிலுள்ள புடவைக் கடைகள் இரண்டு, 'நல்லி' என்ற பெயரை தங்களது பொருள்களில் எவ்வாறு பயன்படுத்தலாம் என்பது குறித்து நீதிமன்றத்தில் மோதிக்கொண்டன.
'நல்லி' என்பதைப் பெயர்ப் பலகையில் இரு வேறுமாதிரியாக போட்டுக்கொண்டுள்ளதை வைத்தே அவ்விரு கடைகளும் வெவ்வேறு என அடையாளம் காணமுடியும்.
இந்தப் பெயரைப் பயன்படுத்துவது குறித்து இவ்விரு கடை உரிமையாளர்களுக்கு இடையே 1997ல் ஒப்பந்தம் ஏற்பட்டது.
அதன்படியே 'நல்லி' என்பதை எவ்வாறு பயன்படுத்தி சிங்கப்பூரில் தொழில் செய்யலாம் என இரு தரப்பும் ஒப்புக்கொண்டதாக உயர்நீதிமன்ற நீதிபதி ஆண்ட்ரே மணியம் வழக்கு விசாரணையின்போது கூறினார்.
"இருதரப்பினரும் அந்த ஒப்பந்தத்தின்படி செயல்படும்வரை அவர்கள் இருவரும் வணிக முத்திரை சட்டமீறலில் ஈடுபட்டதாகக் கூறமுடியாது.
"பெயரைப் பயன்படுத்தும் விதத்தில் குழப்பம் இருந்தாலும், ஒப்பந்தப்படி அவர்கள் நடந்துகொண்டால் வணிக முத்திரை சட்டமீறலிலோ மற்றொருவரின் பொருள்களைப் போல் தமது பொருள்களை விற்கும் குற்றச்சாட்டுக்கோ ஆளாக மாட்டார்கள்," என்று நீதிபதி ஆண்ட்ரே மணியம் விளக்கினார்.
'நல்லி சின்னசாமி செட்டி பிரைவேட் லிமிடெட்', 'நல்லி பிரைவேட் லிமிடெட்' ஆகிய இரு நிறுவனங்களும் தங்களது வர்த்தகத்துக்கு 'நல்லி' என்ற பெயரைப் பயன்
படுத்தலாம்.
நல்லி சின்னசாமி செட்டி பிரைவேட் லிமிடெட் நிறுவனம், தன்னை 'சிங்கப்பூரில் இருக்கும் ஒரே நல்லி வர்த்தகம்' என விளம்பரப்படுத்திக் கொள்ளக்கூடாது. அது தனது வர்த்தகத்தை 'நல்லி சின்னசாமி செட்டி' என்றுதான் விளம்பரப்படுத்திக்கொள்ள வேண்டுமே தவிர 'நல்லி' என்று மட்டும் கூறிக்கொள்ளக்கூடாது.
எண் 16 பஃப்ளோ ரோட்டிலுள்ள நல்லி சின்னசாமி செட்டி பிரைவேட் லிமிடெட், தமிழ்நாட்டில் நல்லி சின்னசாமி செட்டி என்ற நிறுவனத்தின் புடவைகளை இங்கு விற்பனை செய்கிறது. இந்த நிறுவனம் 'நல்லி' என்ற தனது பெயரை விளம் பரப் பலகையில் சாய்ந்த நிலையில் வடிவமைத்திட வேண்டும்.
இதற்கு மாறாக, 'நல்லி பிரைவேட் லிமிடெட்' என்னும் மற்றொரு நிறுவனம் 'நல்லி' என்பதைத் தனிப்பெரும் பெயராக தனது வர்த்தக முத்திரையாகவோ வர்த்தகப் பெயராகவோ பயன்படுத்தக்கூடாது.
இந்த ஒப்பந்தத்தை நல்லி பிரைவேட் லிமிடெட் மீறிவிட்டதாக தமிழ்நாட்டைச் சேர்ந்த நல்லி சின்னசாமி செட்டி நிறுவனமும் சிங்கப்பூரின் நல்லி சின்னசாமி செட்டி பிரைவேட் லிமிடெட் நிறுவனமும் தங்களது வழக்கறிஞர்கள் மூலமாக வாதாடினர்.
அவர்களின் வழக்கறிஞர்கள் நல்லி பிரைவேட் லிமிடெட் நிறுவனம் 'நல்லி' என தனது பெயரை பிரதானமாக விளம்பரப்படுத்தி
யுடன் அதனுடன் இணைந்திருக்க வேண்டிய பிரைவேட் லிமிடெட் என்ற வாசகங்கள் எண் 2C பஃப்ளோ ரோடு கடையில் முக்கியத்துவமில்லாத வகையில் பெயர்ப் பலகையில் சிறியதாக இடம்பெறுவதாக வாதிட்டனர்.
அத்துடன், தங்களது வணிக முத்திரையாகவும் தங்களது விற்பனைப் பைகள், புடவைப் பெட்டிகள், விலைப் பட்டியல் அட்டைகளில் 'நல்லி', 'நல்லி சிங்கப்பூர்' ஆகிய பெயர்களே இடம்பெறுவதாகக் கூறினர்.
மேலும், நல்லி பிரைவேட் லிமிடெட் நிறுவனத்தார் தங்கள் கடையின் காட்சிப் பெட்டகத்தில் 'மூல நல்லி பொருள்கள்' என்ற வாசகத்தில் 'நல்லி' என்ற வார்த்தைக்கு முக்கியத்துவம் கொடுக்கப்பட்டுள்ளதாகவும் நல்லி சின்னசாமி செட்டி நிறுவனத்தின் வழக்கறிஞர்களான ராதாகிருஷ்ணனும் சூரிய பிரகாஷ் உதயசூரியனும் வாதாடினர்.
நல்லி பிரைவேட் லிமிடெட் நிறு வனம் சார்பாக பிரயன் மானாஃப் கவுஸ், ஜாஸ்மின் டோ ஆகிய வழக்கறிஞர்கள் நீதிமன்றத்தில் முன்னிலையாகி வாதாடினர்.
நல்லி பிரைவேட் லிமிடெட் சார்பில் இந்த வழக்கு நீதிமன்ற வழக்காடும் முறையை தவறாகப் பயன்
படுத்துவதற்கு ஒப்பாகும் என்றும் குடும்பத் தகராற்றை நீதிமன்றத்தில் கொண்டுவந்துள்ளாகவும் கூறி இதை நிராகரிக்கக் கோரினர்.
இந்த வாதத்தை நிராகரித்த நீதிபதி மணியம், "இது குடும்பத் தகராறாக இருக்கலாம். எனினும், துரதிர்ஷ்டவசமாக பல குடும்ப தகராறு தொடர்பான வழக்குகளில் வாதி, பிரதிவாதி ஆகியோரின் உரிமைகளுக்கு நீதிமன்றம்தான் விளக்கம் தரமுடியும்.
"பிரதிவாதியின் நடவடிக்கைகள் சரியில்லை என்றால், வாதி இதில் வழக்குத் தொடர உரிமையுண்டு," என்று கூறி, நல்லி சின்னசாமி செட்டி பிரைவேட் லிமிடெட் நிறுவனத்துக்கு சாதகமாக தீர்ப்பு வழங்கினார்.
நல்லி சின்னசாமி செட்டி நிறுவனம் தமிழ்நாட்டில் 1928ஆம் ஆண்டு தொடங்கப்பட்டது.
இதன் இரண்டு பங்குதாரர்கள் நல்லி சின்னசாமி செட்டி பிரைவேட் லிமிடெட் நிறுவனத்தின் பங்குதாரர்கள். இவர்கள் நல்லி சின்னசாமி செட்டி அவர்களின் முதல் மனைவியின் வாரிசுகள்.
மற்றொரு புறம் பிரதிவாதி நிறுவனமான நல்லி பிரைவேட் லிமிடெட்டின் முக்கிய பங்குதாரர்களில் ஒருவரான திருமதி ஏ.எம். மாதவன், சின்னசாமி செட்டி அவர்களின் இரண்டாம் மனைவியின் பேத்தி.
இந்த வழக்கில் ஒப்பந்தத்தை மீறியதற்காக பிரதிவாதி நல்லி பிரைவேட் லிமிடெட் தரவேண்டிய இழப்பீட்டுத் தொகை குறித்து பின்னொரு தேதியில் விசாரிக்கப்படும் என்று நீதிபதி திரு மணியம் மே 27ஆம் தேதி தமது தீர்ப்பில் கூறினார். மேலும், தங்கள் பைகள், புடவை விற்பனையில் பயன்படுத்தப்படும் விற்பனைப் பைகள், புடவைப் பெட்டிகள், விலைப் பட்டியல் போன்றவற்றில் நல்லி என்ற பெயர், ஒப்பந்தத்தை மீறும் வகையில் பயன்படுத்தப்பட்டுள்ளதால் அதற்குத் தடையுத்தரவு விதித்தும் தீர்ப்பளிக்கப்பட்டது.