மாணவர் முரசு
இ-பேப்பர்
நான்கு ஆண்டுகளுக்கு முன்பு, 'ஹஷிமோட்டோ தைராய்டிடிஸ்' எனும் பெண்களை எளிதில் பாதிக்கக்கூடிய தைராய்டு பிரச்சினையால் அவதிப்பட்டார் 47 வயதாகும் திருமதி கவிதா சின்ஹா.
பால், 'குளூட்டன்' எனப்படும் பசையப் பொருள் ஆகியவற்றைக் கொண்டுள்ள உணவுகளை உட்கொள்ளும்போது உடல்நலப் பிரச்சினை மோசமடைந்ததால் உணவுமுறையை மாற்றிக்கொண்டார்.
அரிசி, கோதுமை ஆகியவற்றில் காணப்படும் பசையப் பொருள் இல்லாத 'குளூட்டன் ஃப்ரீ' எனும் உணவு வகைகளை உட்கொள்ளத் தொடங்கினார்.
பசையப் பொருள் இல்லாத 'சவர் பிரட்' எனும் இயற்கையான நொதிப்புமுறையில் தயாரிக்கப்படும் ரொட்டியின் செய்முறையை இணையம்வழி கற்று தாமே தயாரிக்கத் தொடங்கினார் கவிதா. ஏனெனில் கடையில் விற்கப்படும் இத்தகைய ரொட்டி, 'குவார் கம்' போன்ற செயற்கைப் பசைகளைப் பயன்படுத்துவதாலும் மாவுச்சத்து அதிகம் இருப்பதாலும் அது ஆரோக்கியத்துக்கு உகந்ததல்ல.
சியா விதைகள், ஆளி விதைகள் போன்றவை பசையப் பொருள்கள் தரும் அதே பயனை அளிக்கும் என்பதை அறிந்த கவிதா, அவற்றை ரொட்டியில் சேர்த்துக்கொண்டார். மிக ஆரோக்கியமான, இயற்கை முறையில் தயாரிக்கப்படும் இவரது ரொட்டி, மற்ற வகை ரொட்டிகளுடன் ஒப்பிடுகையில் எளிதில் செரிக்கக்கூடியது.
குடும்பத்தினருக்கு இதன் சுவை பிடிக்கவே நாளடைவில் நண்பர்களுக்கும் செய்துதந்தார் கவிதா. பின்னர் இந்த செய்முறையைப் பிறருக்கு கற்பிக்கத் தொடங்கினார்.
கடந்த மூன்று ஆண்டுகளாக கம்போங் பாருவில் 'மை ஆர்கானிக் ஸ்பூன்' எனும் சமையல் பள்ளியை நடத்திவருகிறார்.
தன்னுடைய மகனுக்குப் பசையம் ஒவ்வாமை இருப்பதால், மகனுக்கு ஏற்றவாறு உணவுகளைத் தயாரிக்கத் திண்டாடிய ஆஷா ராஜன் ஸ்ரீராம், கவிதாவின் வகுப்புகளுக்குச் சென்று ஆரோக்கியமான முறையில் ரொட்டி தயாரிப்பைக் கற்றுக்கொண்டதாகக் கூறினார்.
நான்கு மணி நேரத்தில் ரொட்டியை ஆரோக்கியமாகத் தயாரிக்கும் முறையை முழுமையாகக் கற்றுக்கொள்ளலாம் என்கிறார் திருமதி கவிதா. சிறுவர் முதல் பெரியவர்கள்வரை யார் வேண்டுமானாலும் இவருடைய வகுப்புகளில் சேரலாம்.
"வகுப்புக்கு வருவோர் அவர்கள் வீட்டிற்குச் சென்று ரொட்டியைத் தாங்களாகவே செய்யும் போது சந்தேகம் எழுந்தால் தெளிவுபடுத்த, நான்கு வாரங்களுக்கு அவர்களுடன் வாட்ஸ்அப் செயலி மூலம் இணைந்திருப்பேன்," என்று கூறினார் கவிதா.
https://www.myorganicspoon.com/ எனும் இணையப்பக்கம் வழி இவரது வகுப்புகளுக்குப் பதிவு செய்துகொள்ளலாம்.