மாணவர் முரசு
இ-பேப்பர்
பெனின்சுலா பிளாசாவின் நான்காவது மாடியில் ஓரமாய் ஒளிந்துள்ளது ஓர் இசைத்தட்டு புதையல். ஏறத்தாழ 40,000 இசைத்தட்டுகள் 'ஃபார் தி ரெகார்ட்' எனும் இக்கடையில் உள்ளன. இவை ஏறத்தாழ 50 ஆண்டுகளாக 73 வயது திரு அழகிரிசாமி சொந்தமாகத் திரட்டியவை.
வீட்டிலுள்ள தமது தனிப்பட்ட திரட்டில் உள்ள 15,000 இசைத்தட்டுகள் உட்பட தம்மிடம் இருப்பதெல்லாம் இசைக்குழுக்கள் வெளியிட்ட முதல் பிரதிகளும் அசல் இசைத்தட்டுகளும் ஆகும் என்று இவர் கூறினார்.
'தி பீட்டல்ஸ்' பிரபல ஆங்கில இசைக்குழுவின் பாடல்களை முதன்முறையாகக் கேட்டபோது மெய்மறந்து போன திரு அழகிரிசாமி அன்றிலிருந்து வானொலி, ரயிலில் வாக்மேனுடனும் இசையுடன் பயணித்தார்.
எனினும் அசல் இசைத்தட்டுக்கு ஈடு இணையில்லை என்று கூறும் இவர், மாணவராக இருந்தபோது வேலைக்குச் சென்று சேமிக்கும் பணத்தில் அவற்றை வாங்க வேண்டும் என்று கனவு கண்டார். 1970ல் அது ஈடேறியது.
ஜோர்ஜ் ஹாரிசானின் 'ஆல் திங்ஸ் மஸ்ட் பாஸ்' எனும் பாடலின் அசல் இசைத்தட்டு அவர் கைக்குக் கிட்டியது. ஐந்தாண்டுகள் கழித்து வீட்டில் இசை கேட்க சொந்தமாக கிராமபோன் ஒன்றை அப்போதே $400க்கு வாங்கினார்.
ராணுவ வீரராகப் பணியாற்றிய திரு அழகிரிசாமி இசைத்தட்டுகளை வாங்க மாதந்தோறும் சில நூறு வெள்ளிகளைச் செலவிடுவார். ஆண்டுக்கு இரு முறையேனும் அவர் ஐரோப்பாவில் நடந்த இசைத்தட்டுச் சந்தைகளுக்குச் சென்று அசல் இசைத்தட்டுகளை வாங்கிவந்துள்ளார்.
"இப்போதுள்ள மின்னிலக்க இசையை இசைத்தட்டோடு ஒப்பிடக்கூட முடியாது. மின்னிலக்க இசை புகைப்படம் என்றால் இசைத்தட்டு ஓர் ஓவியம். அதில் உயிருண்டு. ஆழமான, மனதைக் கட்டிப்போடும் இசையை இசைத்தட்டுகளில் மட்டுமே கேட்டு உணர முடியும்," என்றார் இவர்.
இசைத்தட்டுகளின் பிரபலம் 1990களில் இசைவட்டின் வருகையுடன் மங்கிப் போனது. $10க்கும் குறைவாக இசைத்தட்டுகள் பல விற்பனையாகின. இப்போதோ வரலாறும் மரபுடைமையும் பேசும் இவை, ஆயிரக்கணக்கான வெள்ளிக்கு விலைபோகின்றன.
2011இல் திரு அழகிரிசாமியின் இசைத்தட்டுக் கடை உதய மானது. ஈ-பே தளத்தில் முதலில் விற்கத் தொடங்கிய அவர், ஓய்வுக்காலத் தொழிலாக பெனின்சுலா பிளாசாவில் சொந்த வர்த்தகத்தைத் தொடங்கினார். சிங்கப்பூருக்கு வரும் வெளிநாட்டினரும் ஆர்வம் கொண்ட இளையர்களும் இவரை அதிகம் நாடுகின்றனர்.
ஆனால், திரு அழகிரிசாமி எளிதில் யாரிடமும் இசைத்தட்டுகளை விற்றுவிடுவதில்லை.
அவ்வாறு $8,000 மதிப்புள்ள மிக அரிய இசைத்தட்டை யாரிடமும் விற்காமல் அவர் வைத்துள்ளார். 'லீஃப் ஹவுண்ட்' எனும் இங்கிலாந்து இசைக்குழுவின் 'க்ரோவர்ஸ் ஆஃப் தி மஷ்ரூம்' எனும் பாடலின் அந்த அசல்பிரதி, சிங்கப்பூரின் மிக விலையுயர்ந்த இசைத்தட்டுகளில் ஒன்றாகும்.
"உண்மையில் இசை ஆர்வமுள்ளோர் வந்து கேட்கும்போது அவர்களுடன் பிணைப்பு ஏற்படுகிறது. இசைத்தட்டுகள் ஒருவித வளம் என்று அறிந்திருப்பவர் களிடம் மட்டுமே நான் விற்கப் பார்க்கிறேன்," என்றார் அவர்.