ஒன்றுமே புரியவில்லை: புலம்பும் மொரிசியோ சாரி

12 Feb 2019 06:10 | மாற்றம் செய்யப்பட்ட நாள் / நேரம்: 12 Feb 2019 08:30

மான்செஸ்டர்: இங்கிலிஷ் பிரிமியர் லீக் காற்பந்துப் போட்டி ஆட்டத்தில் செல்சியை 6=0 எனும் கோல் கணக்கில் மான்செஸ்டர் சிட்டி நேற்று அதிகாலை பிழிந்து எடுத்தது.
இந்தப் படுதோல்வி செல்சி நிர்வாகி மொரிசியோ சாரியை அதிர்ச்சியில் உறைய வைத் துள்ளது. தமக்கு ஒன்றுமே புரியவில்லை என்று அவர் செய்தியாளர்களிடம் புலம்பினார்.
"இந்தப் படுதோல்வி குறித்து என்னால் விளக்கம் அளிக்க முடியவில்லை. பயிற்சியின்போது சிறப்பாகச் செயல்பட்டோம். ஆட்டம் தொடங்கி மூன்று நிமிடங்களில் சிட்டி கோல் போட்டதும் எனது வீரர்கள் துவண்டுவிட்டார்கள் என்று நினைக்கிறேன். எங்களால் விளையாட முடியாமல் போனது. எனக்கு ஒன்றுமே புரியவில்லை. வலிமைமிக்க குழுவுக்கு எதிராக விளையாடியபோது நிறைய தவறுகளைச் செய்துவிட்டோம்," என்று சாரி கூறினார்.
1991ஆம் ஆண்டில் நாட்டிங் ஹம் ஃபாரஸ்ட் குழுவுக்கு எதிராக 7=0 எனும் கோல் கணக்கில் தோற்ற பிறகு, நேற்றைய ஆட்டத்தில்தான் செல்சி மிக மோசமான முறையில் தோல்வியைத் தழுவியுள்ளது.