மாணவர் முரசு
இ-பேப்பர்
பாரிஸ்: ‘எச்’ பிரிவு யூரோ தகுதிச் சுற்று ஆட்டம் ஒன்றில் அண்டோரா குழுவை 3-0 எனும் கோல் கணக்கில் நேற்று பிரான்ஸ் வென்றது. வளர்ந்து வரும் நட்சத்திரமான பிரெஞ்சு தாக்குதல் ஆட்டக்காரர் கிங்ஸ்லி கோமன், இந்த ஆட்டத்தில் ஒரு கோல் போட்டதோடு குழுவின் வெற்றிக்கு முக்கியமானவராக விளங்கினார்.
ஆட்டத்தின் இரண்டாவது பாதியில் அவர் எதிரணி வலையை நோக்கி அனுப்பிய பந்து கோல் கம்பத்தின் மீது பட்டு திரும்பியதற்குப் பதிலாக வலைக்குள் புகுந்திருந்தால் அவரது பெயரில் கோல் எண்ணிக்கை இரட்டிப்பாகி இருக்கக்கூடும்.
உலகக் கிண்ண வெற்றியாளரான பிரான்ஸ், ‘எச்’ பிரிவில் ஆறு ஆட்டங்கள் விளையாடிய நிலையில் 15 புள்ளிகளுடன் இரண்டாவது நிலையில் உள்ளது. தகுதிச் சுற்று ஆட்டங்களில் காற்பந்துச் சக்தியாக உருவெடுத்து வரும் துருக்கி, முதலிடம் வகிக்கிறது.
கடந்த ஜூன் மாதம் இஸ்தான்புல் நகரில் துருக்கியிடம் பிரான்ஸ் தோல்வி கண்டது. அடுத்த மாதம் பாரிசில் இவ்விரு குழுக்களும் மீண்டும் மோதவிருப்பது ரசிகர்கள் மத்தியில் பெரும் எதிர்பார்ப்பை உருவாக்கியுள்ளது.
