தென்னாப்பிரிக்கா அபார வெற்றி

செஞ்சூரியன்: செஞ்சூரியனில் நடைபெற்ற ‘பாக்சிங் டே’ டெஸ்ட் போட்டியில் இங்கிலாந்தை 107 ஓட்டங்கள் வித்தியாசத்தில் வீழ்த்தியது தென்னாப்பிரிக்கா.

பூவா தலையாவில் வென்ற இங்கிலாந்து பந்துவீச்சைத் தேர்வு செய்தது. அதன்படி முதலில் களம் இறங்கிய தென்னாப்பிரிக்கா டி காக்கின் (95) சிறப்பான ஆட்டத்தால் 284 ஓட்டங்கள் குவித்தது. இங்கிலாந்து அணி சார்பில் ஸ்டூவர்ட் பிராட், சாம் கர்ரன் ஆகியோர் தலா நான்கு விக்கெட்டுகளை வீழ்த்தினர்.

அதன்பின் முதல் இன்னிங்சில் விளையாடிய இங்கிலாந்து 181 ஓட்டங்களில் சுருண்டது. ஜோ டென்லி அதிகபட்சமாக 50 ஓட்டங்கள் சேர்த்தார். தென்னாப்பிரிக்க அணி சார்பில் பிலாண்டர் நான்கு விக்கெட்டுகளையும் ரபாடா 3 விக்கெட்டுகளையும் நோர்க்கியா 2 விக்கெட்டுகளையும் வீழ்த்தினர்.

பின்னர் 103 ஓட்டங்கள் முன்னிலையுடன் தென்னாப்பிரிக்கா இரண்டாவது இன்னிங்சைத் தொடங்கியது. வான் டெர் டுசென் 51 ஓட்டங்களும் நோர்க்கியா 40 ஓட்டங்களும் சேர்க்க தென்னாப்பிரிக்கா 272 ஓட்டங்கள் சேர்த்து அனைத்து விக்கெட்டுகளையும் இழந்தது. இங்கிலாந்து அணி சார்பில் ஆர்ச்சர் 5 விக்கெட்டு களை வீழ்த்தினார்.

முதல் இன்னிங்சில் 103 ஓட்டங்கள் முன்னிலை பெற்று இருந்ததால் தென்னாப்பிரிக்கா ஒட்டுமொத்தமாக 385 ஓட்டங்கள் முன்னிலை பெற்றிருந்தது.

இதனால் இங்கிலாந்து அணியின் வெற்றிக்கு 386 ஓட்டங்கள் வெற்றி இலக்காக அது நிர்ணயித்தது.

ஏறத்தாழ இரண்டரை நாட்கள் மீதமிருந்ததால் நிலைத்து நின்று விட்டால் வெற்றி பெற்றுவிடலாம் என்ற நோக்கத்தில் இங்கிலாந்து இரண்டாவது இன்னிங்சைத் தொடங்கியது.

நேற்று முன்தினம் மூன்றாவது நாள் ஆட்ட முடிவில் இங்கிலாந்து ஒரு விக்கெட் இழப்பிற்கு 121 ஓட்டங்கள் எடுத்திருந்தது. ரோரி பர்ன்ஸ் 77 ஓட்டங்களுடனும் ஜோ டென்லி 10 ஓட்டங்களுடனும் களத்தில் இருந்தனர். சிறப்பாக விளையாடிய ரோரி பர்ன்ஸ் களத்தில் நின்றதால் இங்கிலாந்து அணியின் வெற்றிக்கு வாய்ப்பு இருப்பதாக கருதப்பட்டது. அதேவேளையில் பந்துவீச்சுக்கு சாதகமான ஆடுகளத்தில் தென்னாப்பிரிக்கா 9 விக்கெட்டுகளையும் வீழ்த்திவிடும் என்றும் கருதப்பட்டது.

இந்நிலையில், நேற்று நான்கா வது நாள் ஆட்டம் தொடங்கியது. ரோரி பேர்ன்ஸ் மேலும் 7 ஓட்டங்கள் எடுத்து 84 ஓட்டங்களில் ஆட்டமிழந்தார். மறுமுனையில் விளையாடிய டென்லி 31 ஓட்டங்களில் வெளியேறினார்.

அதன்பின் வந்த அணித் தலைவர் ஜோ ரூட் ஓட்டங்கள் எடுக்கப் போராடினார். ஆனால் 48 ஓட்டங்கள் எடுத்த நிலையில் அவர் ஆட்டமிழந்தார்.

பென் ஸ்டோக்ஸ் 14 ஓட்டங்களிலும் பேர்ஸ்டோ 9 ஓட்டங்களிலும் ஜோஸ் பட்லர் 22 ஓட்டங்களிலும் சாம் கர்ரன் 9 ஓட்டங்களிலும் ஆட்டமிழக்க இங்கிலாந்து 268 ஓட்டங்களில் அனைத்து விக்கெட்டுகளையும் இழந்தது.

இதனால் தென்னாப்பிரிக்கா 107 ஓட்டங்கள் வித்தியாசத்தில் அபார வெற்றி பெற்றது. ரபாடா நான்கு விக்கெட்டுகளையும் நோர்க்கியா 3 விக்கெட்டுகளையும் வீழ்த்தினர்.

முதல் இன்னிங்சில் 95 ஓட்டங்கள் எடுத்த குவின்டன் டி காக் ஆட்ட நாயகன் விருது பெற்றார். இரு அணிகளுக்கும் இடையிலான இரண்டாவது டெஸ்ட் வரும் 3ஆம் தேதி கேப் டவுனில் நடக்கிறது.