மாணவர் முரசு
இ-பேப்பர்
தோக்கியோ: 100 மீட்டர் நெஞ்சு நீச்சல் போட்டியில் தங்கத்தைக் கைப்பற்றினார் அமெரிக்க வீராங்கனை லிடியா ஜேக்கபி.
ஒலிம்பிக் விளையாட்டுகளில் முதன்முறையாகப் பங்கேற்கும் ஜேக்கபி எடுத்துக்கொண்ட நேரம் 1 நிமிடம் 4.95 வினாடி.
ஜேக்கபியின் வெற்றி அவருக்கே இன்ப அதிர்ச்சியாக அமைந்தது. மூன்றாவது இடத்திலிருந்த அவர், கடைசி 15 மீட்டர் தூரத்தில் அபாரமாக நீந்தி முதலிடத்திற்கு வந்து தங்கத்தைக் கைப்பற்றினார்.
போட்டியை மற்றோர் அமெரிக்கரான லில்லி கிங் வெல்வார் எனப் பரவலாக எதிர்பார்க்கப்பட்டது. சென்ற ஒலிம்பிக் விளையாட்டுகளின் 100 மீட்டர் எதேச்சை பாணி நீச்சல் போட்டியில் தங்கம் வென்ற கிங், அந்த பிரிவில் இரண்டு முறை உலகப் போட்டிகளையும் வென்றவர்.
பதக்கத்தை வெல்வதற்கான ஆற்றல் தன்னிடம் உள்ளது என்ற நம்பிக்கை இருந்தாலும் தங்கம் கிட்டும் எனத் தான் எதிர்பார்க்கவில்லை என்றார் ஜேக்கபி. அமெரிக்காவின் அலாஸ்கா மாநிலத்தைச் சேர்ந்தவர் ஜேக்கபி.
முதன்முறையாக அம்மாநிலத்தைச் சேர்ந்த ஒருவர் ஒலிம்பிக் விளையாட்டுகளில் தங்கம் வென்றிருக்கிறார்.
அலாஸ்காவில் ஒலிம்பிக் விதிமுறைகளைப் பூர்த்திசெய்யும் பரப்பளவைக் கொண்ட ஒரு நீச்சல் குளம் மட்டுமே அமைந்துள்ளது. அதுவும் ஜேக்கபியின் விட்டிற்கு சுமார் 202 கிலோமீட்டர் தூரத்தில் அமைந்துள்ளது.
போட்டியில் வெள்ளிப் பதக்கத்தை வென்றார் தென்னாப்பிரிக்காவின் டாயானா ஷோன்மாக்கர். கிங், வெண்கலத்தை வென்றார்.
பெண்கள் 100 மீட்டர் மல்லாந்த நீச்சலில் ஆஸ்திரேலியாவின் கேலீ மெக்கியோன் ஒலிம்பிக் சாதனை படைத்து தங்கப் பதக்கத்தைக் கைப்பற்றினார்.
அவர் 57.47 வினாடியில் போட்டியை முடித்து தங்கத்தை வென்றார். கனடாவின் கைலி மேஸி வெள்ளிப் பதக்கத்தை வென்றார்.
வெண்கலப் பதக்கத்தை வென்றார் அமெரிக்காவின் ரீகன் ஸ்மித்.
மெக்கியோனும் ஸ்மித்தும் வைரிகள்.
ஆண்கள் 200 மீட்டர் மல்லாந்த பாணி நீச்சல் போட்டியில் பிரிட்டனின் டாம் டீன் தங்கம் வென்றார். போட்டியில் சற்று பின்தங்கியிருந்த டீன், கடைசி 50 மீட்டர் தூரத்தில் சிறப்பாக நீந்தி தங்கத்தைக் கைப்பற்றினார்.
1 நிமிடம் 44.22 வினாடியில் முடித்து தேசிய சாதனை படைத்தார் டீன்.
வெள்ளிப் பதக்கத்தை வென்றார் பிரிட்டனின் மற்றொரு வீரர் டன்கன் ஸ்காட். பிரேசிலின் ஃபெர்னாண்டோ ஷெஃபர் வெண்கலப் பதக்கத்தை வென்றார்.