மாணவர் முரசு
இ-பேப்பர்
தோக்கியோ: ஆண்கள் 100 மீட்டர் எதேச்சை பாணி நீச்சல் போட்டியில் தங்கம் வென்றுள்ளார் அமெரிக்காவின் கேலப் டிரெசல்.
போட்டியை 47.02 வினாடியில் முடித்து ஒலிம்பிக் சாதனை படைத்தார் டிரெசல். இந்த ஒலிம்பிக் விளையாட்டுகளில் அவர் வென்ற இரண்டாவது தங்கப் பதக்கம் இது. இதற்கு முன் அவர் ஆண்கள் 100 மீட்டர் எதேச்சை பாணி அஞ்சல் நீச்சல் போட்டியிலும் தங்கம் வென்றார்.
இந்த ஒலிம்பிக்கில் டிரெசல் அதிகபட்சமாக மொத்தம் ஏழு தங்கப் பதக்கங்களை வெல்லக்கூடும். போட்டியில் வெள்ளிப் பதக்கத்தை வென்றார் ஆஸ்திரேலியாவின் ஷேல்மர்ஸ் கைல். வெண்கலப் பதக்கம் ரஷ்ய ஒலிம்பிக் குழுமத்தின் கொலெஷ்னிக்கொவ் க்லிமென்ட்டுக்குச் சென்றது.
ஒலிம்பிக் விளையாட்டுகளில் முதன்முறையாக நடைபெற்ற 800 மீட்டர் எதேச்சை பாணி நீச்சல் போட்டியில் எதிர்பார்ப்புகளுக்கு மாறாக தங்கத்தைக் கைப்பற்றினார் அமெரிக்கர் பாபி ஃபிங்க. போட்டியில் இத்தாலியின் கிரேகோரியோ பால்ட்ரினியோரிதான் வெல்வார் எனப் பரவலாக எதிர்பார்க்கப்பட்டது.
போட்டியின் முதல் 750 மீட்டர் தூரத்திற்கு அவர் முன்னிலையில் இருந்தார். ஆனால் அதற்குப் பிறகு அபாரமாக நீந்தி தங்கத்தைப் பறித்துக்கொண்டார் ஃபிங்க.
அவர் எடுத்துக்கொண்ட நேரம் ஏழு நிமிடங்கள் 41.87 வினாடி. வெள்ளிப் பதக்கத்தை பால்ட்ரினியோரி வென்றார். வெண்கலப் பதக்கம் உக்ரேனின் மிக்காய்லோ ரொமான்சுக்கிற்குச் சென்றது. ஆண்கள் 200 மீட்டர் நெஞ்சு நீச்சல் போட்டியில் தங்கத்தைக் கைப்பற்றினார் ஆஸ்திரேலியாவின் சேக் ஸ்ட்பல்டி-குக். போட்டியை முடிக்க ஸ்ட்பல்டி-குக் எடுத்துக்கொண்ட இரண்டு நிமிடங்கள் 6.38 வினாடி நேரம் ஓர் ஒலிம்பிக் சாதனை. வெள்ளிப் பதக்கத்தை வென்றார் நெதர்லாந்தைச் சேர்ந்த ஆர்னோ கமிங்கா. வெண்கலப் பதக்கத்தை வென்றவர் ஃபின்லாந்தின் மேட்டி மேட்சன்.
பெண்கள் 200 மீட்டர் வண்ணத்துப்பூச்சி பாணி நீச்சல் போட்டியில் சீனாவின் சாங் யூஃபெய் தங்கப் பதக்கத்தை வென்றார். போட்டியை 2 நிமிடங்கள் 3.86 வினாடியில் முடித்து ஒலிம்பிக் சாதனை படைத்தார் அவர். வெள்ளி, வெண்கலப் பதக்கங்கள் இரண்டும் அமெரிக்காவிற்குச் சென்றன.
பெண்கள் 200 மீட்டர் எதேச்சை பாணி அஞ்சல் நீச்சல் போட்டியை ஏழு நிமிடங்கள் 40.33 வினாடியில் முடித்து உலகச் சாதனையை முறியடித்து தங்கம் வென்றது சீனா. 21 ஆண்டுகளில் முதன்முறையாக இந்தப் போட்டியை அமெரிக்காவோ ஆஸ்திரேலியாவோ வெல்லவில்லை.