மாணவர் முரசு
இ-பேப்பர்
மட்ரிட்: ஐரோப்பிய சாம்பியன்ஸ் லீக் காற்பந்துக் கிண்ணத்தை ஆக அதிகமாக 13 முறை வென்றுள்ளபோதும், முதல் முறையாக அத்தொடருக்குத் தகுதி பெற்றுள்ள மால்டோவா நாட்டின் ஷெரிஃப் திராஸ்போல் குழுவிடம் 2-1 என்ற கோல் கணக்கில் தோற்று அதிர்ச்சியளித்தது ஸ்பெயினின் ரியால் மட்ரிட் குழு.
ஆட்டம் தொடங்கி 25வது நிமிடத்தில் தலையால் முட்டி கோல் அடித்து ஷெரிஃப் குழுவிற்கு முன்னிலை பெற்றுத் தந்தார் உஸ்பெகிஸ்தான் வீரர் யக்ஷிபோயெவ்.
இந்த 'டி' பிரிவு ஆட்டத்தின் இரு பாதிகளிலும் ரியால் குழுவே ஆதிக்கம் செலுத்தியபோதும் பதில் கோலடித்து, ஆட்டத்தைச் சமனுக்குக் கொண்டுவர அதற்கு ஒரு பெனால்டி வாய்பு தேவைப்பட்டது.
அந்த வாய்ப்பைத் தவறவிடாமல் கோல் போட்டார் ரியால் குழுவின் பிரெஞ்சு ஆட்டக்காரர் கரிம் பென்சிமா.
அதன்பின் ரியால் குழு முன்னிலைக்குச் செல்ல அருமையானதொரு கோல் வாய்ப்பு கிட்டியும் அதனைக் கோட்டைவிட்டார் மாற்று வீரராக வந்த லூக்கா யோவிச்.
ஆனால், யாரும் எதிர்பாராத விதமாக ஆட்டத்தின் 89வது நிமிடத்தில் அற்புதமாக கோலடித்து, ஷெரிஃப் குழுவிற்கு நம்ப முடியாததொரு வெற்றியைத் தேடித் தந்தார் செபாஸ்டியன் தில்.
இந்த ஆட்டத்தில் ரியால் குழுவினர் மொத்தம் 30 முறை எதிர் அணியின் வலையை நோக்கிப் பந்தை உதைத்தபோதும் அவர்களின் கோல் முயற்சிகள் ஈடேறவில்லை. அத்துடன், அவர்களுக்கு 13 கார்னர் வாய்ப்புகளும் கிடைத்தன.
போர்ட்டோ குழுவைப் போட்டுத் தள்ளிய லிவர்பூல்
இதனிடையே, போர்ச்சுகலின் போர்ட்டோ குழுவிற்கு எதிராக நேற்று அதிகாலை நடந்த 'பி' பிரிவு ஆட்டத்தில் லிவர்பூல் குழு 5-1 என்ற கோல் கணக்கில் வாகை சூடியது. லிவர்பூல் சார்பில் முகம்மது சாலா, ஃபிர்மினோ ஆகியோர் ஆளுக்கு இரண்டு கோல்களையும் சாடியோ மனே ஒரு கோலையும் போட்டனர்.
'பி' பிரிவில் நடந்த மற்றோர் ஆட்டத்தில், கடைசி நேரத்தில் பெனால்டி மூலம் லூவிஸ் சுவாரெஸ் கோலடிக்க, அட்லெட்டிகோ மட்ரிட் 2-1 என்ற கோல் கணக்கில் ஏசி மிலான் குழுவை மண் கவ்வச் செய்தது.