மாணவர் முரசு
இ-பேப்பர்
லிவர்பூல்: லிவர்பூல் காற்பந்துக் குழுவில் 15 ஆண்டுகளுக்கு மேல் கால்பதித்து திறமையான மத்திய திடல் வீரராக பெயர் பெற்ற ஸ்டீவன் ஜெரார்ட் தற்பொழுது ஆஸ்டன் வில்லா குழுவின் நிர்வாகியாக குறிப்பிட்டுச் சொல்லக்கூடிய அளவுக்கு திறமையாகவே செயல்படுகிறார் என்று கூறப்படுகிறது.
ஸ்டீவன் ஜெரார்ட் விளையாட்டாளராக திகழ்ந்த காலகட்டத்திற்கு பிறகு அவர் எப்படி பெயர் பெறப் போகிறார் என்பது அவரால் இறுதியில் லிவர்பூல் குழுவை நிர்வகிக்க இயலுமா என்பதைப் பொறுத்தே இருப்பதாக காற்பந்து விமர்சகர்கள் கூறுகின்றனர்.
ஆஸ்டன் வில்லா நிர்வாகப் பொறுப்பை ஏற்றுக்கொண்டுள்ள ஜெரார்ட்டுக்கு இன்றைய ஆட்டமே மிக முக்கியமானது.
அவருடைய பொறுப்பில் ஆஸ்டன் வில்லா குழு இதுவரை நன்றாகவே விளையாடி வருகிறது.
எனினும், லிவர்பூல் குழுவின் நிர்வாகியாக, திறம்படப் பெயர் பெற்று வரும் யர்கன் கிளோப்பின் பயிற்சியால், பிரிமியர் லீக் தரவரிசைப் பட்டியலில் இரண்டாம் இடத்தில் இருந்துகொண்டு மான்செஸ்டர் யுனைடெட் போன்ற குழுக்களை எளிதில் ஊதித் தள்ளிய லிவர்பூலை சமாளிப்பது அவ்வளவு சுலபமல்ல.
அதிலும், லிவர்பூலின் சாலா, சாடியோ மானே, டியோகோ ஜோட்டா ஆகிய தாக்குதல் வீரர்கள் தற்பொழுது காட்டும் ஆட்டத் திறனை வைத்துப் பார்க்கும்
பொழுது அந்தக் குழுவை வெல்வது ஆஸ்டன் வில்லாவுக்கு நிச்சயம் குதிரைக் கொம்பாகவே இருக்கும்.
ஆனால், குறைந்த கோல் எண்ணிக்கையில் தோல்வியைத் தழுவினாலோ இல்லை அதற்கும் மேலாக லிவர்பூல் போன்ற ஒரு குழுவுடனான போட்டியில் சம
நிலை கண்டாலோ அதுவே ஸ்டீவன் ஜெரார்ட்டுக்கு பெரும் வெற்றிதான். லிவர்பூலில் முன்னைய வீரர் கென்னி டால்கிலிஷ், ஸ்டீவன் ஜெரார்ட் போலவே விளையாட்டாள ராக ஆரம்பித்து பின்னர் அதே குழுவில் நிர்வாகியாகப் பொறுப் பேற்று ஓரளவு முத்திரை பதித்தார்.
காற்பந்து குழுக்களை நிர்வகிக்கும் பொறுப்பிற்கு ஜெரார்ட் தம்மை நன்றாகவே தயார்ப்படுத்திக்கொண்டுள்ளார். லிவர்பூல் குழுவின் 18 வயதுக்குக்கீழ் உள்ள விளையாட்டாளர் அணியை அவர் 18 மாதங்களுக்கு நிர்வகித்தார்.
அங்கு தற்பொழுது லிவர்பூல் குழுவின் நிர்வாகியாக பொறுப்பு வகிக்கும் யர்கன் கிளோப்பிடம் நிர்வாகப் பொறுப்பை ஓரளவு கற்றுக்கொண்டுள்ளார். இதைத் தொடர்ந்து ரேஞ்சர்ஸ் குழுவில் ஜெரார்ட் சாதித்தது அவரைப் பலரும் உற்றுநோக்க வைத்துள்ளது.
இதெல்லாம் ஒருபுறம் இருக்கட்டும். தற்போதைய நிலையில் லிவர்பூலில் யகர்ன் காலம் 2024ஆம் ஆண்டு முடிவுறும் காற்பந்து பருவம் வரையில்தான். அதற்குப்பின் அவர் ஏற்கெனவே கூறியதுபோல் காற்பந்து நிர்வாகப் பொறுப்பிலிருந்து சற்றே ஒதுங்கியிருப்பாரா, இல்லை லிவர்பூல் சகாப்தத்தைத் தொடர்வாரா என்பது வெறும் யூகம்தான்.
ஆனால் ஒன்று மட்டும் நிச்சயம். ஜெரார்ட், ஆஸ்டன் வில்லாவை தொடர்ந்து திறம்பட நிர்வகித்து கிளோப்பும் லிவர்பூல் குழுவுக்கு முழுக்குப் போட்டால் ஜெரார்ட்டை கொண்டு வரவேண்டும் என்ற கூச்சல் அதிகரிக்கும் என்பது
திண்ணம்.