மாணவர் முரசு
இ-பேப்பர்
மான்செஸ்டர்: இந்த இங்கிலிஷ் பிரிமியர் லீக் பருவத்தின் முக்கியமான கட்டத்தில் அபாரமாக ஆடத் தொடங்கியுள்ளது, கடந்த சில வாரங்களாக சுமாராக ஆடி வென்றுவந்த மான்செஸ்டர் சிட்டி காற்பந்து அணி. மேலும், அண்மைக் காலமாக சற்று களையிழந்த இவ்வணியின் கெவின் டி பிரோய்ன், ஜாக் கிரீலிஷ் போன்ற சில நட்சத்திரங்கள் புத்துயிர் பெற்றுள்ளனர்.
லீட்ஸ் யுனைடெட் அணியை 7-0 எனும் கோல் கணக்கில் சுக்கு நூறாக்கியது சிட்டி. இந்த ஏழு கோல்களில் இரண்டைப் போட்டார் டி பிரோய்ன. "கடினமாக உழைத்து முடிந்தவரை விரைவில் மீண்டுவருவதை மட்டும்தான் என்னால் செய்யமுடிந்தது," என்று பிடி ஸ்போர்ட் ஊடகத்திடம் கூறினார் நீண்ட இடைவேளைக்குப் பிறகு சிறப்பாக ஆடிய டிபிரோய்ன.
"இப்பருவத்தின் தொடக்கத்தில் அவர் சிரமப்பட்டதால் படிப்படியாக தேறிவருவதைப் பார்க்கும்போது மகிழ்ச்சியாக இருக்கிறது," என்று சிட்டி நிர்வாகி பெப் கார்டியோலா டிபிரோய்னவைப் பற்றிக் கூறினார். "முக்கியமான ஆட்டங்களில் (டி பிரோய்னவால்) தனது முழு ஆற்றலை வெளிப்படுத்த முடியவில்லை, மீண்டுவர ஆரம்பித்தபோது அவருக்கு கொவிட்-19 கிருமித்தொற்று ஏற்பட்டது. இனி நீண்ட காலத்திற்கு அவர் தொடர்ந்து சிறப்பாக ஆடுவார் என்ற நம்பிக்கையைக் கொண்டுள்ளேன், ஏனென்றால் அவர் எங்களுக்குத் தேவை, நமக்கு மிக மிக முக்கியமான விளையாட்டாளர்," என்றார் கார்டியோலா. சிட்டி அணியில் மீண்டும் தொடர்ந்து இடம்பெற டி பிரோய்ன போராடவேண்டும் என்று சில நாள்களுக்கு முன்புதான் கார்டியோலா கூறியிருந்தார்.
இப்பருவம் தொடங்குவதற்கு முன் 100 மில்லியன் பவுண்ட் தொகைக்கு வாங்கப்பட்ட கிரீலிஷும் இவ்வாட்டத்தில் ஒரு கோலைப் போட்டார். இதற்கு முன் அவரால் எதிர்பார்ப்புகளை நிறைவு செய்ய முடியவில்லை. சிட்டியின் இதர கோல்களைப் போட்டவர்கள் ஃபில் ஃபோடன், ரியாட் மாஹ்ரெஸ், ஜான் ஸ்டோன்ஸ், நேத்தன் எக்கே. தன்னைப் பற்றிக் குறை சொல்பவர்களுக்குத் தொடர்ந்து பாடம் புகட்டிவருகிறது சிட்டி.
மற்றொரு லீக் ஆட்டத்தில் ஸ்டீவன் ஜெரார்ட் நிர்வகிக்கும் ஆஸ்டன் வில்லா, நோரிச் சிட்டியை 2-0 எனும் கோல் கணக்கில் வென்றது. ஜேக்கப் ரேம்சி, ஒலி வாட்கின்ஸ் ஆகியோர் கோல்களைப் போட்டனர். லில்லாவைச் சிறப்பாகச் செய்ய வைக்கும் இலக்குடன் இயங்குகிறார், ஸ்காட்லாந்தின் கிளாஸ்கோ ரேஞ்சர்ஸ் அணியைப் பெரிதும் மேம்படுத்திய ஜெரார்ட்.
லீட்ஸ் யுனைடெட்டிற்கு எதிராக மான்செஸ்டர் சிட்டி தனது முழு ஆற்றலைக் காட்டியது