மாணவர் முரசு
இ-பேப்பர்
லிவர்பூல்: இங்கிலிஷ் பிரிமியர் லீக் பட்டியலில் முதலிடத்தை வகிக்கும் மான்செஸ்டர் சிட்டிக்குக் கடும் போட்டி தருகின்றன பட்டியலில் இரண்டாம் இடத்தில் உள்ள லிவர்பூல், மூன்றாம் இடத்தை வகிக்கும் செல்சி. இவ்விரு அணிகளும் இன்று பின்னிரவு ஆடவுள்ளன. லிவர்பூல், நியூகாசல் யுனைடெ்டைச் சந்திக்கிறது. எவர்ட்டனுடன் மோதுகிறது செல்சி.
சென்ற பருவம் அதிகம் சிரமப்பட்ட லிவர்பூல், இம்முறை பெரிதும் மேம்பட்டுள்ளது. எவ்வளவு பெரிய அணியையும் சாதாரணமாகத் தோற்கடிக்கூடிய ஆற்றல் இதனிடம் உள்ளது.
கோல்களைக் குவித்த வண்ணம் இருந்த லிவர்பூல், கடந்த இரண்டு பிரிமியர் லீக் ஆட்டங்களில் 1-0 எனும் கோல் கணக்கில்தான் வென்றது. எனினும், இதனிடம் ஒரு வகை கம்பீரம் தென்படுகிறது. மேலும், லிவர்பூல் அதிக கோல்களை விடுவதும் இல்லை.
அதே வேளையில், செல்சியின் நிலை சற்று வித்தியாசமானது. கடந்த சில வாரங்களாகத் தடுமாறிய செல்சி, அதிக கோல்களை விட்டுக்கொடுத்துவருகிறது. எனினும், லீட்ஸ் யுனைடெட்டிற்கு எதிரான சென்ற லீக் ஆட்டத்தில் ஒரு வழியாக வெற்றியடைந்து மீண்டுவந்தது.
"இது மிகவும் சவாலான ஆட்டமாக அமைந்ததால் நமது ஆற்றல், நாம் போட்ட முயற்சி இரண்டையும் பொறுத்தவரையில் நான் மகிழ்ச்சியடைகிறேன்," என்று அவ்வாட்டத்திற்குப் பிறகு செல்சியை நினைத்துப் பெருமைப்பட்டார் இதன் நிர்வாகி தாமஸ் டூக்கல்.
"இந்த வெற்றிக்கு நாங்கள் தகுதியானவர்கள், இருந்தாலும் ஆட்டத்தின் கூடுதல் நேரத்தில் வெற்றி கோலை அடித்தது சற்று அதிர்ஷ்டவசமானதுதான்," என்றும் டூக்கல் குறிப்பிட்டார். லீட்ஸை 3-2 எனும் கோல் கணக்கில் வென்றது செல்சி.
லீக் பட்டியலில் தற்போது இரண்டாம் இடத்தை வகிக்கிறது லிவர்பூல், மூன்றாம் இடத்தில் உள்ளது செல்சி. லிவர்பூல், நியூகாசலை வென்றால் சிட்டிக்கு ஒரு புள்ளி வித்தியாசத்தில் பின்னால் இருக்கும். எனினும், லிவர்பூல் தோல்வியடைந்து எவர்ட்டனுக்கு எதிரான ஆட்டத்தில் செல்சி வென்றால், இது இரண்டு புள்ளிகள் வித்தியாசத்தில் இரண்டாம் இடத்திற்கு முன்னேறும், லிவர்பூல் மூன்றாம் இடத்திற்கு விழும். இரண்டில் எந்த அணி தோல்வியடைந்தாலும் லீக் கிண்ணத்தை வெல்வதற்கான வாய்ப்புகள் குறையும்.
லிவர்பூல் சந்திக்கவுள்ள நியூகாசல், செல்சியுடன் மோதவுள்ள எவர்ட்டன் ஆகிய இரண்டும் தற்போது சிரமப்பட்டுக்கொண்டிருக்கின்றன.