மாணவர் முரசு
இ-பேப்பர்
அடிலெய்ட்: ஆஷஸ் கிரிக்கெட் தொடரில் ஆஸ்திரேலியாவுக்கு எதிரான இரண்டாம் டெஸ்ட் ஆட்டத்திற்காக ஜேம்ஸ் ஆண்டர்சன், ஸ்டுவர்ட் புரோட் ஆகியோர் இங்கிலாந்தின் 12-பேர் அணியில் சேர்க்கப்பட்டுள்ளனர். டெஸ்ட் ஆட்டங்களில் இங்கிலாந்துக்கு ஆக அதிக விக்கெட்டுகளை வெளியேற்றிய பெருமைகொண்ட இவ்விருவரும் இத்தொடரின் முதல் ஆட்டத்தில் இடம்பெறவில்லை.
முதல் ஆட்டத்தில் 13 ஓவர்களில் 102 ஓட்டங்களை விட்ட இங்கிலாந்தின் ஜாக் லீச்சும் அணியில் தேர்ந்தெடுக்கப்பட்டுள்ளார். இங்கிலாந்து, ஆஷஸ் தொடரின் முதல் ஆட்டத்தைத் தோல்வியடைந்த பிறகும் கிண்ணத்தை வென்று 66 ஆண்டுகள் ஆகிவிட்டன. மேலும், ஆஸ்திரேலியாவில் இதற்கு முன் தான் ஆடிய 11 டெஸ்ட் ஆட்டங்களில் இங்கிலாந்து வெற்றிபெறவில்லை. பெரும் சவாலை எதிர்கொள்ள மனத்தைத் திடப்படுத்தி வெற்றிகாணும் இலக்கைக் கொண்டுள்ளது இவ்வணி.
காயமடைந்துள்ள ஆஸ்திரேலிய வீரர் ஜோஷ் ஹேசல்வுட்டின் இடத்தை ஜை ரிச்சர்ட்சன் எடுக்கவுள்ளார். இதோடு, பிரிஸ்பனில் நடைபெற்ற முதல் ஆட்டத்தில் காயமுற்ற பென் ஸ்டோக்ஸால் இரண்டாம் ஆட்டத்தில் பங்கேற்கமுடியும் என்பது உறுதிசெய்யப்பட்டுள்ளது.
பகலிரவு ஆட்டமாக அரங்கேறவுள்ள இந்த ஆஷஸ் தொடரின் இரண்டாவது ஆட்டம், அடிலெய்ட் நகரில் இன்று மதியம் தொடங்கும். இவ்வாட்டத்தில் இளஞ்சிவப்புப் பந்து பயன்படுத்தப்படும். கடந்த நான்கு பகலிரவு ஆட்டங்களில் மூன்றில் தோல்வியடைந்துள்ளது இங்கிலாந்து.