மாணவர் முரசு
இ-பேப்பர்
நோரிச்: இந்த இங்கிலிஷ் பிரிமியர் லீக் காற்பந்துப் பருவத்தில் சரியான வேளையில் ஆர்சனலின் ஆற்றல் வெளிப்படும் அறிகுறிகள் தென்படுகின்றன. பெரிதும் சிரமப்பட்டுக்கொண்டிருந்த இந்த அணி, லீக் பட்டியலில் தொடர்ந்து நான்காவது இடத்தை வகித்துவருகிறது.
நேற்று முன்தினம் நடைபெற்ற லீக் ஆட்டத்தில் நோரிச் சிட்டியை 5-0 எனும் கோல் கணக்கில் வென்றது ஆர்சனல். புக்காயோ சாக்கா, கியேரன் டயர்னி, கேப்ரியல் மார்டினெல்லி போன்ற இதன் இளம் வீரர்கள் மிகவும் அபாரமாக ஆடிவருகின்றனர். இத்தனைக்கும் இது பருவத்தின் பாதிக் கட்டம்தான்.
மற்றோர் ஆட்டத்தில் கிரிஸ்டல் பேலஸை 3-0 எனும் கோல் கணக்கில் வென்றது ஆர்சனலின் பரம வைரியான டாட்டன்ஹம் ஹாட்ஸ்பர்.
புதிய நிர்வாகி ஆன்டோனியோ கொன்டேயின் தலைமையில் அசத்திவருகிறது ஸ்பர்ஸ். ஆகக் கடைசி நிலவரப்படி லீக் பட்டியலில் ஐந்தாம் இடத்தில் உள்ளது ஸ்பர்ஸ்.
இப்பருவத்தின் தொடக்கத்தில் சரியாக விளையாடாதபோதும் தங்களின் படிப்படியான முன்னேற்றத்தால் இதர அணிகளுக்கு மிரட்டல் விடுக்கின்றன ஸ்பர்ஸ், ஆர்சனல்.