வாட்ஃபர்ட்: இங்கிலிஷ் பிரிமியர் லீக் காற்பந்து ஆட்டத்தில் வாட்ஃபர்ட் குழுவை 3-0 எனும் கோல் கணக்கில் நார்விச் சிட்டி நேற்று முன்தினம் பந்தாடியது.
அமெரிக்க நட்சத்திரமான ஜோஷ் சார்ஜெண்ட் போட்ட இரண்டு கோல்கள் நார்விச்சின் வெற்றிக்கு வித்திட்டன.
இங்கிலிஷ் பிரிமியர் லீக் போட்டி யில் சார்ஜெண்ட் கோல் போட்டு இருப்பது இதுவே முதல்முறை.
எனவே, அண்மையில் தந்தையான 21 வயது சார்ஜெண்ட்டுக்கு இது இரட்டிப்புக் கொண்டாட்டம்.
லீக் பட்டியலில் கடைசி மூன்று (18வது, 19வது, 20வது) இடங்களில் போட்டியை முடிக்கும் குழுக்கள் அடுத்த பருவத்தில் இரண்டாம் நிலை லீக்கிற்குத் தள்ளப்படும்.
வாட்ஃபர்ட் குழுவுக்கு எதிரான ஆட்டத்தில் வெற்றி பெற்றதன் மூலம், கடைசி மூன்று இடங்களிலிருந்து நார்விச் வெளியேறி 17வது இடத்துக்கு முன்னேறியுள்ளது.
முற்பாதி ஆட்டத்தில் இரு குழுக்களும் கோல் ஏதும் போடவில்லை.
பிற்பாதி தொடங்கி கிட்டத்தட்ட ஆறு நிமிடங்களில் நார்விச்சின் முதல் கோலை சார்ஜெண்ட் போட்டார். அவர் கோல் போட்ட விதம் அனைவரையும் பிரமிக்க வைத்தது.
ஆட்டத்தின் 74வது நிமிடத்தில் வாட்ஃபர்ட் குழுவின் பெனால்டி எல்லைக்குள் அனுப்பப்பட்ட பந்தைத் தலையால் முட்டி வலைக்குள் சேர்த்தார் சார்ஜெண்ட்.
இந்நிலையில், ஆட்டத்தின் 78வது நிமிடத்தில் வாட்ஃபர்ட் குழுவுக்கு மேலும் ஒரு பின்னடைவு ஏற்பட்டது. தப்பாட்டம் காரணமாக அக்குழுவின் இமானுவல் டெனி சுக்குச் சிவப்பு அட்டை காட்டப்பட்டது. இதனால் எஞ்சிய ஆட்டத்தை வாட்ஃபர்ட் வெறும் பத்து ஆட்டக்காரர்களுடன் விளை யாடியது. இருப்பினும், அது மனந்தளராமல் கோல் முயற்சிகளில் ஈடுபட்டது. ஆனால் நார்விச்சின் தற்காப்பு சிறிதும் விட்டுக் கொடுக்கவில்லை.
ஆட்டம் முடிய சில வினாடிகள் மட்டுமே இருந்தபோது, வாட்ஃபர்ட் தற்காப்பு ஆட்டக்காரர் சொந்த கோல் போட்டார். வாட்ஃபர்ட் குழு லீக் பட்டியலில் 18வது இடத்தில் உள்ளது.