ஹனோய்: தென்கிழக்காசிய விளையாட்டுகளில் திடல்தட வீரர்கள் மிதமிஞ்சிய திறமையை வெளிப்படுத்தியன்மூலம் சிங்கப்பூர் விளையாட்டுக்கு ஒளிமயமான எதிர்காலம் இருப்பதாக சிங்கப்பூர் விளையாட்டுக் கழக நிர்வாகி தெரிவித்து உள்ளார்.
தென்கிழக்காசிய விளையாட்டுப் போட்டிகள் நிறைவடைவதையொட்டி வியட்னாம் தலைநகர் ஹனோயில் நேற்று அவர்கள் செய்தியாளர்களிடம் பேசினர்.
ஹயட் ரீஜென்சி ஹோட்டலில் நடைபெற்ற செய்தியாளர் கூட்டத்தில் சிங்கப்பூர் விளையாட்டுக் கழகத்தின் தலைவர் சூ சுன் வெய் பேசினார்.
அப்போது அவர் கூறுகையில், "தென்கிழக்காசிய விளையாட்டுப் போட்டிகளில் சிங்கப்பூர் அணி சிறப்பாகச் செய்துள்ளது. நாம் சாதித்துவிட்டோம் என்பதைப் பெருமையுடன் கூறிக்கொள்கிறோம்.
"இதுவரை பெற்றிருக்கும் சாதனைகளோடு நாம் திருப்தி அடைந்துவிடக்கூடாது. இன்னும் சிறப்பான லட்சியங்களுக்குக் குறிவைக்க வேண்டும்.
"எனவே, நமக்கு நாமே வகுத்துக்கொண்ட எதிர்பார்ப்புகளையும் இலக்குகளையும் பூர்த்தி செய்திருக்கிறோம் என்பதை நான் சொல்லியாக வேண்டும்," என்று அவர் கூறினார்.
இருப்பினும் அந்த இலக்குகள் என்ன என்று அவர் விளக்கவில்லை.
சிங்கப்பூர் அணி நேற்றுக் காலை வரையிலான நிலவரப்படி 161 பதக்கங்களைப் பெற்றிருந்தது. 47 தங்கம், 44 வெள்ளி, 70 வெண்கலப் பதக்கங்களை உள்ளடக்கிய எண்ணிக்கை இது.
இறுதிநாளான நேற்றும் போட்டிகள் நடைபெற்றதால் மேலும் சில பதக்கங்களை சிங்கப்பூர் வீரர்கள் குவிக்க முயன்றுகொண்டு இருந்தனர்.
சிங்கப்பூர் அணியில் 424 வீரர்கள் இடம்பெற்றுள்ளனர். இவர்கள் 33 விளையாட்டுகளுக்கான போட்டிகளில் கலந்துகொண்டனர்.
பதக்கப் பட்டியலில் ஐந்தாம் இடத்திற்கு முன்னேறி இறுதிவரை அந்த இடத்தைத் தக்கவைத்துக் கொண்டது சிங்கப்பூர்.
இருப்பினும் கொவிட்-19 பரவலுக்கு முன்னர் நடைபெற்ற இரு தென்கிழக்காசியப் போட்டிகளில் பெற்றதைக் காட்டிலும் குறைவான தங்கப்பதக்கம் இம்முறை கிடைத்துள்ளது.
2017ஆம் ஆண்டு கோலாலம்பூரில் நடைபெற்ற போட்டிகளில் சிங்கப்பூர் அணி 58 தங்கப்பதக்கங்களுடன் 4ஆம் இடத்தைப் பிடித்திருந்தது.
அடுத்த போட்டிகள் 2019ஆம் ஆண்டு பிலிப்பீன்ஸில் நடைபெற்றபோது சிங்கப்பூருக்கு 53 தங்கப்பதக்கம் கிடைத்தது.
இம்முறை சிங்கப்பூர் அணி ஐந்து தென்கிழக்காசியப் போட்டி சாதனைகளையும் 12 தேசிய சாதனைகளையும் 34 தனிநபர் சாதனைகளையும் நிகழ்த்தி உள்ளது.
மேலும், சிங்கப்பூரின் நீச்சல் வீரர்கள் மூலம் அதிகப் பதக்கங்கள் கிடைத்தன. 21 தங்கம், 11 வெள்ளி, 12 வெண்கலப் பதக்கங்களை அவர்கள் வென்றனர்.
சிங்கப்பூர் சார்பாக இம்முறை 245 அறிமுக வீரர்கள் அனுப்பப்பட்டனர்.
அணி வென்ற 161 பதக்கங்களில் 57 விழுக்காடு, அதாவது 61 பதக்கங்களை அறிமுக வீர்கள் வென்று சாதித்தனர். மொத்த பதக்க எண்ணிக்கையில் இது கிட்டத்தட்ட மூன்றில் ஒரு பங்கு.
"பாதிக்கு மேற்பட்டவர்கள் புதியவர்களாக இருந்தபோதிலும் நமது அணி சாதித்து உள்ளது," என்றார் திரு சூ.
சிங்கப்பூர் அறிமுக வீரர்கள் மூன்றில் ஒரு பங்கு பதக்கங்களை வென்று சாதித்தனர்