மாணவர் முரசு
இ-பேப்பர்
லிவர்பூல்: உல்வ்ஸ் குழுவுக்கு எதிரான ஆட்டத்தில் லிவர்பூல் அபாரமாக விளையாடி 3-1 எனும் கோல் கணக்கில் வெற்றி பெற்றது.
ஆட்டத்தின் மூன்றாவது நிமிடத்திலேயே உல்வ்ஸ் குழு கோல் போட்டு முன்னிலை வகித்தது.
ஆனால் சிறிதளவும் பதற்றம் அடையாமல் சாடியோ மானே, முகம்மது சாலா, ராபர்ட்சன் மூலம் கோல்களைப் போட்டு லிவர்பூல் வெற்றிக் கனியைப் பறித்தது.
ஆனால் ஆட்டம் முடிந்ததும் லிவர்பூலின் புகழ்பெற்ற ஆன்ஃபீல்ட் விளையாட்டரங்கில் கொண்டாட்டம் ஏதும் இல்லை.
மாறாக, அதன் ரசிகர்கள் சோகமே உருவாக இருந்தனர்.
ஆஸ்டன் வில்லாவுக்கு எதிரான ஆட்டத்தின் கடைசிக்கட்டத்தில் சிட்டி வெற்றி கோலைப் போட்டு வெற்றியாளர் பட்டத்தைத் தட்டிச் சென்றதே இதற்குக் காரணம்.
சிட்டி அதன் கடைசி ஆட்டத்தில் வெற்றி பெற்றதால் 93 புள்ளிகளுடன் முதல் இடத்தைப் பிடித்தது.
லிவர்பூல் 92 புள்ளிகளுடன் இரண்டாவது இடத்தைப் பிடித்தது.
வில்லாவிடம் சிட்டி சமநிலை கண்டிருந்தாலோ அல்லது தோல்வி அடைந்திருந்தாலோ லிவர்பூல் கிண்ணம் ஏந்திருக்கும்.
கடைசி நேரத்தில் சிட்டி வெற்றி கோலைப் போட்டதால் லீக் பட்டத்தை நூலிழையில் லிவர்பூல் இழந்தது. லிவர்பூல் ஏற்கெனவே லீக் கிண்ணத்தையும் எஃப்ஏ கிண்ணத்தையும் வென்றுவிட்டது.
நேற்று முன்தினம் லீக் பட்டத்தையும் தனக்குச் சொந்தமாக்கிஇருந்தால் 'ஹாட்ரிக்' சாதனையாகி இருக்கும்.
ஆனால் 'ஹாட்ரிக்' சாதனையைப் பதிவு செய்யும் வாய்ப்பு அதற்கு இன்னும் இருக்கிறது.
சிங்கப்பூர் நேரப்படி வரும் ஞாயிற்றுக்கிழமை அதிகாலை பாரிசில் நடைபெறும் சாம்பியன்ஸ் லீக் காற்பந்துப் போட்டியின் இறுதி ஆட்டத்தில் ரியால் மட்ரிட் குழு
வுடன் லிவர்பூல் மோதுகிறது.
தோல்வியிலும் ஓர் ஆறுதல்
இதற்கிடையே, லீக் போட்டியில் ஆக அதிக கோல்களைப் போட்ட வீரருக்கு வழங்கப்படும் தங்க காலணி விருது லிவர்பூல் நட்சத்திர வீரர் முகம்மது சாலாவுக்கும் ஸ்பர்ஸ் குழுவின் தென்கொரிய வீரரான சோன் ஹியூங் மின்னுக்கும் வழங்கப்பட்டது.
இருவரும் தலா 23 கோல்கள் போட்டிருப்பது குறிப்பிடத்தக்கது.
நேற்று முன்தினம் நடைபெற்ற ஆட்டத்தில் நார்விச் சிட்டியை 5-0 எனும் கோல் கணக்கில் ஸ்பர்ஸ் பந்தாடியது.
இதில் சோன் இரண்டு கோல்களைப் போட்டார்.
இந்த வெற்றியின் மூலம் லீக் பட்டியலில் நான்காவது இடத்தை ஸ்பர்ஸ் பிடித்து அடுத்த பருவத்தில் சாம்பியன்ஸ் லீக் காற்பந்துப் போட்டியில் விளையாடத் தகுதி பெற்றுள்ளது.
தங்க காலணி விருது வென்றிருப்பதைத் தம்மால் நம்ப முடியவில்லை என்று உணர்ச்சி பொங்க செய்தியாளர்களிடம் சோன் கூறினார்.
