மாணவர் முரசு
இ-பேப்பர்
லிவர்பூல்: இங்கிலிஷ் பிரிமியர் லீக் காற்பந்தில் லிவர்பூல் தற்போது சிரமப்பட்டுக்கெண்டிருந்தாலும் அதுவே லீக் கிண்ணத்தை வெல்ல மான்செஸ்டர் சிட்டிக்கு ஆக அதிக போட்டி தரக்கூடிய குழு என்று சிட்டி நிர்வாகி பெப் கார்டியோலா கூறியுள்ளார். இரு குழுக்களும் லீக்கில் இன்று மோதுகின்றன.
"அவர்களின் ஆற்றல் என்ன என்பது எனக்குத் தெரியும், எங்களது ஆற்றலைப் பற்றி அவர்களுக்கும் தெரியும். லீக் பருவத்தில் மூன்றே ஆட்டங்கள் எஞ்சியிருக்கும் சூழல் ஏற்பட்டால் அவர்களால் முதலிடத்தைப் பிடிக்கமுடியாது என்று நான் சொல்லிவிடுவேன். ஆனால் பருவம் நிறைவடைய இன்னும் பல ஆட்டங்கள் எஞ்சியுள்ளன, உலகக் கிண்ணப் போட்டி வேறு நடைபெறவுள்ளது. அதனால் என்ன வேண்டுமானாலும் நடக்கலாம்," என்று கார்டியோலா செய்தியாளர்களிடம் கூறினார்.
லீக் பட்டியலில் சிட்டி இரண்டாம் இடத்தில் உள்ளது. சிட்டியைவிட 13 புள்ளிகள் குறைவாக எடுத்துள்ள லிவர்பூல் பட்டியலில் 11வது இடத்தில்தான் உள்ளது.
எனினும், இன்று நடைபெறவுள்ள ஆட்டத்தில் லிவர்பூல் வென்றால் திடீரென அதன் நிலை மாறியுள்ள ஓர் உணர்வு பிறக்கும். ஆனால் சிட்டியை வெல்வது மட்டுமின்றி அதன் நட்சத்திரம் எர்லிங் ஹாலண்டைக் கோல் போடவிடாமல் தடுப்பதும் லிவர்பூல் எதிர்கொள்ளும் இமாலய சவால்கள்.
இருந்தாலும், சிட்டியையும் திக்குமுக்காடச் செய்யும் ஆற்றல் உள்ள ஒரு குழு என்றால் அது லிவர்பூல்தான் என்ற கருத்து கடந்த சில ஆண்டுகளாக இருந்து வந்துள்ளது.
"இந்த ஆட்டத்திற்குக் குழுவை தயார்ப்படுத்துவது நான் விரும்பிச் செய்யும் ஒன்று. ஆனால் காற்பந்தில் நாம் சந்திக்கக்கூடிய ஆகப் பெரிய சவால் இதுவாகத்தான் இருக்கமுடியும்," என்று லிவர்பூல் நிர்வாகி யர்கன் கிளோப் சொன்னார். அதே வேளையில், பண பலம் இருந்தால் எதையும் சாதிக்கலாம் என்பதைச் சொல்லி சிட்டியை இடித்தும் காட்டினார் கிளோப்.
சிரமமே இல்லாமல் கோல்களைக் குவிக்கும் சிட்டி இதர குழுக்களை அச்சுறுத்தும் வண்ணம் விளையாடுகிறது. அதே வேளையில் எல்லா குழுக்களையும் வெல்லவே சிரமப்படுகிறது லிவர்பூல். எனினும், யூயேஃபா சாம்பியன்ஸ் லீக்கில் சென்ற வாரம் ரேஞ்சர்ஸ் குழுவை 7-1 எனும் கோல் கணக்கில் வீழ்த்தியது லிவர்பூலுக்குப் புத்துயிர் தரக்கூடும்.