மாணவர் முரசு
இ-பேப்பர்
சிங்கப்பூர்: தெம்பனிஸ் ரோவர்ஸ் காற்பந்துக் குழுவிற்கு எதிரான ஆட்டத்தில் 'ஹாட்ரிக்' கோல் அடித்து 3-2 எனும் கோல் கணக்கில் ஹவ்காங் யுனைடெட்டிற்கு வெற்றியைத் தேடித் தந்தார் கிறிஸ்டிஜன் கிராஜெக். இதன்மூலம் ஹவ்காங்கிற்கு அதன் முதல் கிண்ணத்தை அவர் பெற்றுத் தந்தார்.
ஹவ்காங் குழுவின் நாயகனாக திகழ்ந்த கிராஜெக்கிடம் ஆட்டத்தில் ஏற்பட்ட திருப்புமுனை குறித்து கேட்கப்பட்டது. ஆட்ட இடைவேளையின்போது கோல் கணக்கு 1-1 என்று இருந்தபோது, காலஞ்சென்ற தம்முடைய சகோதரரின் படம் பொறிக்கப்பட்ட சட்டையை அணிந்தது திருப்புமுனையாக அமைந்ததாக அவர் பதில் அளித்தார்.
"பத்து ஆண்டுகளுக்கு முன்பு, டாரியோவுக்கு 15 வயதாக இருந்தபோது அவர் இறந்துவிட்டார்," என்றார் குரோவேஷிய வீரரான கிராஜெக், 29.
அவரது சிறப்பான ஆட்டத்தால் 41 ஆண்டுகளில் அதன் முதல் கிண்ணத்தை ஹவ்காங் வென்றது. வெற்றிப் பரிசாக $50,000 காசோலையுடன் ஏஎஃப்சி கிண்ணப் போட்டிக்குத் தகுதிபெறுவதற்கான வாய்ப்பையும் ஹவ்காங் குழு பெற்றுள்ளது.