மாணவர் முரசு
இ-பேப்பர்
தோஹா: இவ்வாண்டின் உலகக் கிண்ணக் காற்பந்துப் போட்டியில் தங்களின் முதல் ஆட்டத்தில் சிறப்பாக விளையாடி ரசிகர்களைக் கவர்ந்தன இங்கிலாந்து, அமெரிக்க அணிகள். இன்று நடைபெறவுள்ள 'பி' பிரிவு ஆட்டத்தில் இவ்விரு அணிகளும் மோதுகின்றன.
இரண்டு அணிகளிலும் பல இளம் விளையாட்டாளர்கள் இடம்பெற்றுள்ளனர். ஈரானை 6-2 எனும் கோல் கணக்கில் வென்றபோது இளையர்களுக்குரிய துடிப்பு இங்கிலாந்திடம் தெள்ளத் தெளிவாகத் தெரிந்தது.
எனினும், உலகக் கிண்ணப் போட்டிகளில் இங்கிலாந்து இதுவரை அமெரிக்காவை வென்றதில்லை. கடைசியாக 2010ஆம் ஆண்டுப் போட்டியில் இரு அணிகளும் மோதியபோது அந்த ஆட்டம் 1-1 எனும் கோல் கணக்கில் சமநிலையில் முடிந்தது.
எனினும். ஈரானுக்கு எதிரான அபார வெற்றி அந்தப் போக்கை மாற்றுவதற்கு இங்கிலாந்துக்குப் போதுமான தன்னம்பிக்கையை வழங்கக்கூடும். காயமுற்றிருந்த அணித் தலைவர் ஹேரி கேன் இந்த ஆட்டத்தில் விளையாடுவார் என்று இங்கிலாந்துப் பயிற்றுவிப்பாளர் கேரத் சவுத்கேட் தெரிவித்திருப்பதும் அணிக்கு உற்சாகம் தரலாம்.
அமெரிக்க அணியில் விளையாட்டாளர்களின் சராசரி வயது 25. இந்தப் போட்டியில் பங்கேற்கும் இரண்டாவது ஆக இளம் அணி அது.
2018ஆம் ஆண்டு நடைபெற்ற சென்ற உலகக் கிண்ணப் போட்டிக்குத் தகுதிபெறத் தவறிய அமெரிக்கா அதற்குப் பிறகு பெரிதும் மேம்பட்டுள்ளது. பயிற்றுவிப்பாளர் கிரெக் பெர்ஹால்டர் பல இளம் வீரர்களை அணியில் சேர்த்திருப்பது அதற்கான காரணங்களில் ஒன்று.
இப்பிரிவில் வேல்ஸ், ஈரான் ஆகிய அணிகளும் இன்று சந்திக்கின்றன. இங்கிலாந்திடம் கண்ட படுதோல்வி ஈரானின் தன்னம்பிக்கையைப் பாதிக்கலாம். 64 ஆண்டுகளில் முதன்முறையாக போட்டிக்குத் தகுதிபெற்றுள்ள வேல்ஸ் இதுவரை ஏமாற்றம் தரவில்லை.
உலகக் கிண்ணம் 2022: உற்சாகத்துடன் ஆடும் இங்கிலாந்தும் அமெரிக்காவும் மோதல்