தோஹா: கவர்ச்சியான விளையாட்டால் இந்த உலகக் கிண்ணக் காற்பந்துப் போட்டியில் அணிகளைப் பந்தாடியுள்ளது பிரேசில். எனினும், இப்போட்டியில் அணி இதுவரை சந்திக்காத சவாலை குரோவேஷியா அளிக்கக்கூடும். குரோவேஷிய அணியில் பல அனுபவம் வாய்ந்த நட்சத்திரங்கள் இருப்பது அதற்குக் காரணம்.
அதோடு, கடைசியாக 2002ஆம் ஆண்டில் உலகக் கிண்ணத்தை வென்ற பிறகு ஒவ்வொரு முறையும் பிரேசில் ஐரோப்பிய அணியால்தான் வெளியேற்றப்பட்டது.
உலகக் கிண்ணப் போட்டியின் காலிறுதிச் சுற்றில் இன்று இவ்விரு அணிகளும் மோதுகின்றன. ஜப்பான், பெல்ஜியம் உள்ளிட்ட அணிகளுக்கு எதிராக குரோவேஷியா சிரமப்பட்டது. ஆனால், தோல்வியடையாமல் பார்த்துக்கொண்டது. அந்த அம்சம் பிரேசிலுக்கு சவாலாக அமையலாம்.
அதேவேளை, பிரேசிலின் அபாரமான விளையாட்டை தடுப்பது சாத்தியமா என்ற கேள்வியும் எழும்.
இப்போட்டியில் பிரேசிலுக்கு மிகச் சிறப்பாக விளையாடியுள்ள வீரர்களில் இருவர் வினிசியஸ் ஜூனியர், ரிச்சார்லிசன். இங்கிலிஷ் பிரிமியர் லீக் குழுவான டோட்டன்ஹம் ஹாட்ஸ்பருக்கு அதிகம் விளையாடாத ரிச்சார்லிசன் உலகக் கிண்ணப் போட்டியில் அசத்துகிறார்.
பிரேசிலின் ஆட்டங்களில் பார்ப்போர் அனைவரின் கவனத்தையும் ஈர்க்கும் வண்ணம் விளையாடி வந்துள்ளார் வினிசியஸ்.
22 வயது வினிசியஸ் ஸ்பெயினின் ரியால் மட்ரிட் குழுவில் விளையாடுகிறார். உலகக் கிண்ணப் போட்டியில் தான் இவ்வளவு சிறப்பாக ஆடுவதற்கு முக்கியக் காரணம் ரியாலின் பயிற்றுவிப்பாளர் கார்லோ அன்சலொட்டி என்று அவர் குறிப்பிட்டார்.
“அன்சலொட்டியிடம் நான் பேசினேன். அப்போது பிரேசிலின் எல்லா ஆட்டங்களிலும் தொடக்கத்திலிருந்து ஆட நான் என்ன செய்யவேண்டும் என்பதன் தொடர்பில் அன்சலொட்டி நிறைய அறிவுரை வழங்கினார். அவர் எனக்கு தன்னம்பிக்கை அளித்தார்,” என்றார் வினிசியஸ்.
“தேவைப்படும்போதெல்லாம் அவர் என்னிடம் கண்டிப்பாக இருப்பார். அவர் எனது தந்தையைப் போன்றவர்,” என்றும் வினிசியஸ் கூறினார். முன்னதாக ரியாலில் சிரமப்பட்ட வினிசியஸ் அன்சலொட்டியின்கீழ் சிறந்து விளங்குகிறார்.
இப்போட்டியில் வினிசியஸ் இதுவரை ஒரு கோலைப் போட்டு இரண்டு கோல்களை உருவாக்கி உள்ளார். தென்கொரியாவுக்கு எதிரான இரண்டாம் சுற்று ஆட்டத்தில் பிரேசிலின் லூக்கஸ் பக்கெட்டா போட்ட கோலை உருவாக்கியவர் வினிசியஸ். அதற்குத் தேவையான வித்தையை குரோவேஷிய அணித் தலைவர் லுக்கா மொட்ரிச்சிடமிருந்து கற்றுக்கொண்டதாகச் சொன்னர் வினிசியஸ்.
இருவரும் ரியால் மட்ரிட்டில் விளையாடுபவர்கள்.
சென்ற உலகக் கிண்ணப் போட்டியின் இறுதியாட்டம் வரை முன்னேறிய குரோவேஷியாவில் பல வயதான விளையாட்டாளர்கள் இருக்கின்றனர். 37 வயது மொட்ரிச், இவான் பெரிசிச், ஆண்ட்ரெ கிராமரிச் உள்ளிட்ட சென்ற போட்டியில் பெயர் பதித்த பல வீரர்கள் இன்னமும் குரோவேஷியாவிற்குச் சிறப்பாக விளையாடி வருகின்றனர். எனினும், அணி பிரேசிலின் ஆற்றலைக் குறைத்து மதிப்பிடவில்லை.
“பிரேசில் இப்போட்டியில் ஆக வேகமான, ஆகச் சிறந்த அணி,” என்றார் குரோவேஷிய பயிற்றுவிப்பாளர் ஸ்லாட்கோ டாலிச். அதே வேளையில், குரோவேஷியாவுக்கும் ஓரளவு வெற்றி வாய்ப்புகள் இருப்பதாக நம்புவதாகவும் அவர் குறிப்பிட்டார்.