மாணவர் முரசு
இ-பேப்பர்
லுசாய்ல்: உலகக் கிண்ணத்தை வென்றே தீரவேண்டும் என்ற வீம்புடன் இருக்கும் அர்ஜென்டினாவின் லயனல் மெஸ்ஸியையும் அவரின் படையையும் தடுத்து நிறுத்தும் பணியில் இன்று இறங்கவுள்ளது குரோவேஷியா.
சென்ற உலகக் கிண்ணப் போட்டியில் குரோவேஷியா இறுதியாட்டம் வரை சென்றது எதிர்பார்ப்புகளுக்கு மாறாக நிகழ்ந்த ஒன்று. பல வேளைகளில் உலகக் கிண்ணப் போட்டிகளில் அவ்வாறு எதிர்பார்ப்புகளை முறியடிக்கும் அணிகள் அடுத்த போட்டியில் அதிகம் சோபிக்காமல் இருக்கும். ஆனால் அதையும் பொய்யாக்கியுள்ளது குரோவேஷியா.
அர்ஜென்டினாவை வென்று தொடர்ந்து இரண்டாவது முறையாக இறுதியாட்டத்திற்குச் செல்ல குரோவேஷியா, லயனல் மெஸ்ஸியை மட்டும் தடுத்தால் போதும் என்பது சில தரப்பினரின் கருத்து.
எனினும், மெஸ்ஸியைத் தடுப்பதில் மட்டும் குரோவேஷியா கவனம் செலுத்தாது என்று கூறியுள்ளார் அந்த அணியின் வீரர் புரூனோ பெட்கொவிச். மாறாக மொத்த அர்ஜென்டினா அணியையும் சீராக விளையாடாமல் இருக்க வைப்பதில்தான் அக்கறை காட்டப்படும் என்றார் இவர்.
"ஒரு விளையாட்டாளரைக் குறிவைத்து அவரைத் தடுப்பதில் மட்டும் கவனம் செலுத்தாமல் அணியைச் சமாளிக்க முயற்சி செய்வோம். அர்ஜென்டினாவில் மெஸ்ஸி மட்டும் விளையாடவில்லை. அதனிடம் பல சிறப்பான விளையாட்டாளர்கள் இருக்கின்றனர். மொத்த அர்ஜென்டினா அணியையும் நாங்கள் தடுக்கவேண்டும்," என்றார் பெட்கொவிச்.
பிரேசிலுக்கு எதிரான இரண்டாம் சுற்று ஆட்டத்தில் தோல்வியின் விளிம்பிலிருந்து குரோவேஷியாவை மீட்டார் பெட்கொவிச்.
லுக்கா மொட்ரிச், இவான் பெரிசிச் போன்ற சில வயதான விளையாட்டாளர்கள்தான் குரோவேஷியாவின் முக்கியமான வீரர்களாக இருந்து வருகின்றனர். இருந்தாலும் அணியின் விளையாட்டில் உற்சாகம் இதுவரை குறைந்ததில்லை.
காலிறுதிச் சுற்றில் இரு அணிகளின் கோல் காப்பாளர்களும் உலகின் கவனத்தை ஈர்த்தனர். பிரேசிலுக்கு எதிரான காலிறுதியாட்டத்தில் வெற்றியாளரை நிர்ணயிக்க ஆட்டம் பெனால்டிகள் வரை சென்றது. அதில் பிரேசில் இரண்டு பெனால்டி வாய்ப்புகளை கோலாக்கத் தவறியது. அவற்றில் ஒரு பெனால்டியைத் தடுத்தார் குரோவேஷியாவின் கோல் காப்பாளர் டாமினிக் லிவாக்கோவிச்.
ஜப்பானுக்கு எதிரான இரண்டாம் சுற்று ஆட்டத்திலும் மூன்று பெனால்டி வாய்ப்புகளைத் தடுத்த லிவாக்கோவிச், இப்போட்டியின் ஆகச் சிறந்த கோல் காப்பாளர்களில் ஒருவராகத் திகழ்கிறார்.
நெதர்லாந்தும் அர்ஜென்டினாவும் மோதிய காலிறுதியாட்டத்தில் லிவாக்கோவிச்சுக்குப் போட்டி தரும் வண்ணம் விளையாடினார் அர்ஜென்டினாவின் எமிலியானோ மார்ட்டினெஸ். வெற்றியாளரை நிர்ணயிக்க அந்த ஆட்டமும் பெனால்டிகள் வரை சென்றது. நெதர்லாந்தின் இரு பெனால்டிகளைத் தடுத்தார் மார்ட்டினெஸ்.
குரோவேஷியா, அர்ஜென்டினா இரண்டும் போட்டியில் இவ்வளவு தூரம் வந்ததற்கு இவ்விருவரும் முக்கியக் காரணம் என்றும் சொல்லலாம்.
உலகளவில் மெஸ்ஸிக்கு இருக்கும் அமோக ஆதரவு, சொந்த நாட்டில் ஆடுவது போன்ற உணர்வைத் தரும் கத்தார் சென்றுள்ள அர்ஜென்டினா ரசிகர்கள் ஆகிய சவால்களை எதிர்நோக்குகிறது, கிழக்கு ஐரோப்பிய நாடுகளுக்குப் பெருமை தேடித் தந்துள்ள குரோவேஷியா.
எனினும், கடைசி விநாடி வரை விட்டுக்கொடுக்காமல் விளையாடும் இந்த அணியின் ஆற்றல் அர்ஜென்டினாவுக்கு சவாலாக அமையக்கூடும்.
ஆட்டத்தை முன்னிட்டு குரோவேஷியாவில் இதுவரை எந்த விளையாட்டாளரும் காயமடையவில்லை. தப்பாட்டம் காரணமாக எந்த வீரரும் ஆட்டத்தில் விளையாட முடியாதபடி நீக்கப்படவும் இல்லை. இது, குரோவேஷிய ரசிகர்களுக்கு நற்செய்தியாக அமைந்துள்ளது.
இப்போட்டியில் மொரோக்கோவுக்கு அடுத்தபடியாக நடுநிலை ரசிகர்களை அதிகம் கவர்ந்துள்ளது குரோவேஷியா.