மாணவர் முரசு
இ-பேப்பர்
புதுடெல்லி: பாரிஸ் ஒலிம்பிக் போட்டியில் பங்கேற்கும் 28 பேர் கொண்ட திடல்தட அணியை இந்திய திடல்தடச் சங்கம் அறிவித்துள்ளது. இதில் தமிழக வீரர்கள் 5 பேர் இடம் பெற்றுள்ளனர்.
பாரிஸ் ஒலிம்பிக் ஜூலை 26ஆம்தேதி பிரான்ஸ் நாட்டின் தலைநகரான பாரிசில் கோலாகலமாக தொடங்குகிறது. ஆகஸ்ட் 11ஆம்தேதி வரை நடைபெறும் இந்த விளையாட்டுத் திருவிழாவில் திடல்தடப் போட்டியில் பங்கேற்கும் 28 பேர் கொண்ட அணியை இந்திய திடல்தடச் சங்கம் அறிவித்துள்ளது. இந்திய அணியில் 17 வீரர், 11 வீராங்கனைகள் இடம்பெற்றுள்ளனர். தோக்கியோ ஒலிம்பிக்கில் தங்கப் பதக்கம் வென்ற ஈட்டி எறிதல் வீரரான நீரஜ் சோப்ரா மீண்டும் களமிறங்குகிறார்.
ஆசிய விளையாட்டு வெற்றியாளர்களான அவினாஷ் சேபிள், தஜிந்தர்பால் சிங் தூர், ஜோரி யார்ராஜி ஆகியோருடன் தமிழகத்தைச் சேர்ந்த பிரவீன் சித்திரவேல், சந்தோஷ் தமிழரசன், ராஜேஷ் ரமேஷ், சுபா வெங்கடேசன், வித்யா ராம்ராஜ் ஆகியோரும் அணியில் இடம்பிடித்துள்ளனர். ஒலிம்பிக்கில் திடல்தடப் போட்டிகள் ஆகஸ்ட் 1 முதல் 11ஆம் தேதி வரை ஸ்டேட் டி பிரான்ஸ் விளையாட்டரங்கில் நடைபெறுகின்றன.
இந்திய தடகள அணி விவரம்
ஆடவர்: அவினாஷ் சேபிள் (3,000 மீட்டர் தடையோட்டம்), நீரஜ் சோப்ரா, கிஷோர் குமார் ஜெனா (ஈட்டி எறிதல்), தஜிந்தர்பால் சிங் தூர் (குண்டு எறிதல்), பிரவீன் சித்ரவேல், அபுல்லா அபூபக்கர் (மும்முறை தாவி நீளம் தாண்டுதல்), அக் ஷ் தீப் சிங், விகாஷ் சிங், பரம்ஜீத் சிங் பிஷ்ட் (20 கி.மீ. நடைபோட்டி), முகமது அனாஸ், முகமது அஜ்மல், அமோஜ் ஜேக்கப், சந்தோஷ் தமிழரசன், ராஜேஷ் ரமேஷ் (4X400 மீட்டர் அஞ்சல் ஓட்டம்), மிஜோ சாக்கோ குரியன் (4X400 மீட்டர் அஞ்சல் ஓட்டம்), சூரஜ் பன்வார்(நடை பந்தய கலப்பு மாரத்தான்), சர்வேஷ் அனில் குஷாரே (உயரம் தாண்டுதல்).
மகளிர்: கிரண் பஹால் (400 மீட்டர்), பருல் சவுத்ரி (3,000 மீட்டர் தடையோட்டம் மற்றும் 5,000 மீட்டர்), ஜோதி யர்ராஜி (100 மீட்டர் தடையோட்டம்), அன்னு ராணி (ஈட்டி எறிதல்), அபா கதுவா (குண்டு எறிதல்), ஜோதிகா ஸ்ரீ தண்டி, சுபா வெங்கடேசன், வித்யா ராம்ராஜ், பூவம்மா எம்ஆர் (4X400 மீட்டர் அஞ்சல் ஓட்டம்), பிராச்சி (4X400 மீட்டர் அஞ்சல் ஓட்டம்), பிரியங்கா கோஸ்வாமி (20 கி.மீ. நடைப் பந்தயம் / நடைபந்தய கலப்பு மாரத்தான்).
