துருக்கி வெற்றி, எகிப்து தோல்வி

திருச்சி: தமிழ்நாட்டில் எகிப்து, துருக்கி வெங்காயத்திற்கு இடையே யார் பிரபலம் என்பதை முடிவு செய்யும் போட்டியில் எகிப்து தோற்றுதுருக்கி வென்று இருக்கிறது.

திருச்சி சந்தைக்கு வந்து சேர்ந்த அந்த நாடுகளைச் சேர்ந்த பெரிய வெங்காயத்தை வாங்க வந்த பலரும் எகிப்திய வெங்காயத்தை சீண்டகூட இல்லை.

அதேவேளையில், திருச்சி சந்தைக்கு வந்த 20 டன் துருக்கி வெங்காயமும் புதன்கிழமையே விற்று தீர்ந்துவிட்டது.

இதனையடுத்து துருக்கியில் இருந்து மேலும் 20 டன் வெங்காயத்தை இறக்குமதி செய்ய வியாபாரிகள் விரும்புகிறார்கள்.

தமிழ்நாட்டின் மத்திய வட்டார மைய சந்தையான திருச்சியில் நாள் ஒன்றுக்கு 3,000 டன் வெங்காயம் இறங்கி, ஏறுகிறது. நேற்று முதல் தர வெங்காயம் 1 கிலோ ரூ. 110க்கு விற்பனையானது.

எகிப்திலிருந்து சென்ற வாரம் 30 டன் வெங்காயம் இறக்குமதியானதாகவும் ஆனால் அதன் கறுஞ்சிவப்பு நிறமும் கார நெடியும் மக்களைக் கவரவில்லை என்றும் கூறப்படுகிறது.

எகிப்திய வெங்காயத்தை கிலோ ரூ.90க்கு கொடுத்தும் வாங்க ஆளில்லை. “எனக்கு எகிப்திய வெங்காயம் பெரும் இழப்பை ஏற்படுத்திவிட்டது,” என்று எஸ். வெள்ளையன் என்ற வியாபாரி கூறினார்.

இந்தியாவில் விளைச்சல் சரியில்லாமல் போனதால் வெங்காயம் இறக்குமதியாகிறது.