மாணவர் முரசு
இ-பேப்பர்
அமெரிக்கத் துணை அதிபராக திருவாட்டி கமலா ஹாரிஸ் தேர்வுபெற்றுள்ளதை அடுத்து அவரது பூர்வீக கிராமமான திருவாரூர் மாவட்டம், துளசேந்திரபுரம் கொண்டாடி வருகிறது.
அதேபோல, ஈரோடு மாவட்டம், பெருமாபாளையம் கிராமவாசிகளின் முகங்களிலும் கடந்த சில நாள்களாக பெருமிதம் தாண்டவமாடி வருகிறது. அவ்வூரைப் பூர்வீகமாகக் கொண்ட மருத்துவர் செலின் கவுண்டர், 43, அதிபர் தேர்தலில் வென்ற ஜோ பைடன் அமைத்துள்ள கொரோனா தடுப்பு வழிகாட்டுக் குழுவில் இடம்பெற்றுள்ளதே அதற்குக் காரணம்.
மருத்துவர் செலின் நியூயார்க் பல்கலைக்கழக மருத்துவக் கல்லூரியில் துணைப் பேராசிரியராகப் பணியாற்றி வருகிறார். அவரின் தந்தை ராஜ் நடராஜன் கவுண்டர் பெருமாபாளையத்தைச் சேர்ந்தவர். அவர் 1960களில் அமெரிக்காவிற்குக் குடிபெயர்ந்துவிட்டார்.
தமது நியமனம் குறித்து இந்தியப் பத்திரிகைகள் வெளியிட்டு உள்ள செய்திப் பக்கங்களைத் தம் டுவிட்டர் பக்கத்தில் பதிவிட்டுள்ள மருத்துவர் செலின், "தமிழகத்தில் உள்ள என் மக்கள் பெருமையாக உணர்கின்றனர்," எனக் குறிப்பிட்டுள்ளார்.
"ஏன் இன்னும் என் பெயர் சாதியைத் தாங்கி நிற்கிறது எனப் பலரும் கேட்கின்றனர். என் தந்தை அமெரிக்காவிற்கு வந்தபோது நடராஜன் என்ற அவரது பெயரை உச்சரிக்க அமெரிக்கர்கள் சிரமப்பட்டனராம். அதனால், நான் பிறக்கும் முன்னரே அவர் தன் பெயரை கவுண்டர் என மாற்றிக்கொண்டார். என் பெயர் எனது வரலாற்றின் ஒரு பகுதி, எனது அடையாளம். நான் மணமுடித்த பிறகும் என் பெயரை மாற்றிக்கொள்ளவில்லை. இப்போதும் அதைச் செய்யமாட்டேன்," என்று அவர் கூறியுள்ளார்.
திருவாட்டி கமலா ஹாரிசின் உறவினர்கள் பல ஆண்டுகளுக்கு முன்னரே துளசேந்திரபுரத்தை விட்டுச் சென்றுவிட்டனர். ஆனால், திருவாட்டி செலின் நான்கு முறை பெருமாபாளையத்திற்கு வந்து சென்றுள்ளார்.
தம் தந்தையின் பெயரில் அங்கு ஓர் அறக்கட்டளையை நிறுவி, குழந்தைகளின் கல்விக்கும் தம் தந்தை பயின்ற மொடக்குறிச்சி அரசு ஆண்கள் மேல்நிலைப் பள்ளிக்கும் உதவி வருகிறார் மருத்துவர் செலின். இவருடைய தாயார் பிரான்சைச் சேர்ந்தவர்.
மருத்துவர் செலினின் உறவினர் திரு தங்கவேல் கூறுகையில், "இரு நாள்களாக ஊரே அவரைப் பற்றித் தான் பேசுகிறது. அவரால் எங்கள் குடும்பத்திற்கே பெருமை," என்றார்.
மொடக்குறிச்சி பள்ளியில் நடந்த 72வது இந்திய சுதந்திர நாள் நிகழ்ச்சியில் திருவாட்டி செலினும் அவரின் கணவரும் தலைமை விருந்தினர்களாகக் கலந்துகொண்டதை நினைவுகூர்ந்தார் அப்பள்ளியின் முன்னாள் தலைமையாசிரியர் ஆவுடையப்பன்,