தமிழக பாஜகவில் ஒரு நட்சத்திர பட்டாளமே இணைந்துள்ள நிலையில், இப்போது புதிதாக ‘ஆக்ஷன் கிங்’ அர்ஜுனும் அப்பட்டியலில் இணைந்துள்ளார்.
ஏற்கெனவே ராதாரவி, கங்கை அமரன், கௌதமி, குஷ்பு, ஆர்கே சுரேஷ், நமீதா, கஸ்தூரி ராஜா உள்ளிட்ட நட்சத்திரங்கள் பாஜகவில் ஐக்கியமாகி உள்ளனர்.
இந்நிலையில், சென்னையில் மத்திய உள்துறை இணை அமைச்சரும் தமிழக தேர்தல் பொறுப்பாளருமான கிஷண் ரெட்டி, தமிழக பாஜக தலைவர் முருகன் ஆகியோரை திடீரென்று நடிகர் அர்ஜுன் சந்தித்துப் பேசினார்.
சட்டமன்றத் தேர்தலில் 20 தொகுதிகளில் போட்டியிட உள்ள பாஜக, இம்முறை எப்படியும் இரட்டை இலக்கத்தில் வென்று விட நிர்ணயித்துள்ளது.
அனைத்து மாநிலங்களிலும் முதலில் திரை நட்சத்திரங்களை தன்பக்கம் இழுத்து மக்களிடம் வாக்குச் சேகரிப்பதை ஒரு யுக்தியாகக் கையாண்டு வருகிறது பாஜக. அதேபாணியை தமிழக பாஜகவும் கடைப்பிடிக்கிறது.
நடிகர் அர்ஜூன் பாஜக தலைவர்களை மரியாதை நிமித்தமாகத்தான் சந்தித்துப் பேசினார் என்று ஒருபுறம் கூறப்படுகிறது.
மறுபுறம், அர்ஜுன் பாஜக சார்பாக தமிழகத்தில் தேர்தல் பிரசாரம் மேற்கொள்ள உள்ளதாகவும் கர்நாடகா மாநிலத்தில் அவருக்கு பாஜகவில் முக்கிய பொறுப்பு அளிக்க இருப்பதாகவும் கூறப்படுகிறது.