மாணவர் முரசு
இ-பேப்பர்
சென்னை: நடிகர் ரஜினியின் உடல்நிலை சீராக இருப்பதாக மருத்துவர்கள் தெரிவித்துள்ளனர்.
இதையடுத்து, நேற்று மாலை நிலவரப்படி, அவர் எந்த நேரத்திலும் வீடு திரும்ப வாய்ப்புள்ளதாக அவரது வட்டாரங்கள் தெரிவித்தன.
முன்னதாக, முதல்வர் மு.க.ஸ்டாலின் ரஜினி சிகிச்சை பெற்று வரும் மருத்துவமனைக்கு நேரில் சென்று அவரது உடல்நலம் குறித்து விசாரித்து அறிந்தார்.
'தாதா சாகேப் பால்கே' விருது பெற்ற பிறகு சென்னை திரும்பிய ரஜினிக்கு திடீர் உடல்நலக் குறைவு ஏற்பட்டது. இதனால் மருத்துவ மனையில் அனுமதிக்கப்பட்டார்.
அவருக்கு மூளைக்குச் செல்லும் ரத்தக்குழாயில் சிறிய அடைப்பு ஏற்பட்டுள்ளது தெரிய வந்தது. இதற்கு உரிய சிகிச்சை அளிக்கப்பட்டதை அடுத்து, அவர் உடல்நலம் தேறி வருவதாக மருத்துவமனை நிர்வாகம் தெரிவித்தது.
கடவுள் அருளால் தம் தந்தை நலமாக இருப்பதாக ரஜினியின் மகள் சவுந்தர்யா கூறியுள்ளார்.
இதற்கிடையே, ரஜினியை நேரில் சந்தித்து உடல்நலம் குறித்து விசாரித்தார் முதல்வர் மு.க.ஸ்டாலின்.மேலும், மருத்துவரிடமும் பேசி விவரங்களைக் கேட்டறிந்தார்.
ரஜினிகாந்த் விரைவில் உடல்நலம் தேற வேண்டும் என ரசிகர்கள் பிரார்த்தனை செய்து வரும் நிலையில், பல்வேறு பிரபலங்களும் திரையுலகத்தினரும் அவர் உடல்நலம் தேற வாழ்த்து தெரிவித்துள்ளனர்.
ரஜினியின் நண்பரும் நடிகருமான கமல்ஹாசன் மருத்துவமனைக்கு நேரில் சென்று ரஜினியைப் பார்க்க இருப்பதாக சமூக வலைத்தளங்களில் ஒரு தகவல் வெளியானது. எனினும் அது உண்மையல்ல என்று பின்னர் கூறப்பட்டது.