மாணவர் முரசு
இ-பேப்பர்
சென்னை: வட இந்திய மாநிலங்களில் கொரோனா தொற்று மீண்டும் மெல்ல அதிகரித்து வரும் நிலையில், தமிழகத்தில் முகக்கவசம் அணிவது கட்டாயமாக்கப்பட்டுள்ளது. பொது இடங்களில் முகக்கவசம் அணியாதவர்களுக்கு ஐநூறு ரூபாய் அபராதம் விதிக்கப்படும் என அரசு அறிவித்துள்ளது.
டெல்லி, உத்தரப் பிரதேசம், ஹரியானா உள்ளிட்ட பல்வேறு மாநிலங்களில் முகக்கவசம் அணிவது கட்டாயமாக்கப்பட்டுள்ளது.
தற்போது தென்னிந்திய மாநிலங்களும் கொரோனா கட்டுப்பாடுகளை மீண்டும் அறிவித்து வருகின்றன.
தமிழகத்தில் கொரோனா தொற்றுப்பரவல் வெகுவாகக் கட்டுக்குள் உள்ள போதிலும், மாநில அரசு பல்வேறு முன்னெச்சரிக்கைகளை மேற்கொண்டு வருகிறது. அதன்படி முகக்கவசம் அணிவது கட்டாயம் என சுகாதாரத்துறை செயலாளர் ராதாகிருஷ்ணன் தெரிவித்துள்ளார்.
இதற்கிடையே, எதிர்வரும் மே 8ஆம் தேதி தமிழகம் முழுவதும் சுமார் நூறாயிரம் இடங்களில் கொரோனா சிறப்பு தடுப்பூசி முகாம் நடைபெறும் என மக்கள் நல்வாழ்வுத்துறை அமைச்சர் மா.சுப்பிரமணியன் தெரிவித்துள்ளார்.
சென்னையில் உள்ள ஐஐடி கல்வி மையத்தில் திடீரென முப்பது பேருக்கு கொரோனா தொற்று உறுதி செய்யப்பட்டுள்ளது. வட மாநிலங்களில் இருந்து வந்த பணியாளர்கள் மூலம் ஐஐடியில் தொற்று பாதிப்பு ஏற்பட்டுள்ளது.
இதையடுத்து நெடுஞ்சாலை, கட்டுமானப் பணிகளுக்காக வட மாநிலங்களில் தமிழகத்துக்கு அழைத்து வரப்படுபவர்களுக்கு உடனடியாக அருகில் உள்ள அரசு மருத்துவமனையில் கொரோனா பரிசோதனை நடத்தப்பட வேண்டும் என தமிழக அரசு உத்தரவிட்டுள்ளது. இதற்கிடையே, மாநிலத்தில் தடுப்பூசி போட்டுக்கொள்ளாதவர்கள் எண்ணிக்கை 20 மில்லியனை நெருங்கி உள்ளதாகவும் சுமார் 13 மில்லியன் தடுப்பூசிகள் வரும் செப்டம்பர் மாதம் காலாவதியாகிவிடும் என்றும் சுகாதாரத்துறை தெரிவித்துள்ளது. இந்நிலையில், தமிழகம் முழுவதும் உள்ள அனைத்து மருத்துவமனைகளையும் தயார் நிலையில் வைத்திருக்க மருத்துவ கல்வி இயக்குநர் நாராயண பாபு உத்தரவிட்டுள்ளார்.