மாணவர் முரசு
இ-பேப்பர்
சென்னை: மாநிலங்களவை உறுப்பினர்கள் தேர்தலுக்கான வேட்புமனு தாக்கல் நேற்று தொடங்கியது.
நாடாளுமன்ற மாநிலங்களவை உறுப்பினர்களின் எண்ணிக்கை 250. தமிழகத்தை சேர்ந்த 18 பேரும் இவர்களில் அடங்குவர். இந்த 18 பேரில் 6 பேரின் பதவிக்காலம் ஜூன் 29ஆம் தேதி நிறைவடைகிறது.
திமுகவைச் சேர்ந்த டி.கே.எஸ்.இளங்கோவன், ஆர்.எஸ்.பாரதி, கே.ஆர்.என். ராஜேஸ்குமார், அதிமுகவைச் சேர்ந்த எஸ்.ஆர்.பாலசுப்பிரமணியம், ஏ.நவநீதகிருஷ்ணன், ஏ.விஜயகுமார் ஆகியோரின் ஆறாண்டு பதவிக்காலம் நிறைவடைகிறது.
இதேபோல், 14 மாநிலங்களைச் சேர்ந்த 51 உறுப்பினர்களின் பதவிக்காலமும் முடிவடைகிறது. எல்லாவற்றையும் சேர்த்து 57 இடங்களுக்கும் புதிய உறுப்பினர்களை தேர்ந்தெடுப்பதற்கான தேர்தல் ஜூன் 10ஆம் தேதி நடைபெற உள்ளது.
இந்தத் தேர்தலுக்கான வேட்புமனுத் தாக்கல் நேற்று தொடங்கியது. தேர்தல் நடத்தும் அலுவலரான சட்டப்பேரவை செயலர் கி.சீனிவாசன், உதவி அலுவலரான ரமேஷ் ஆகியோரிடம் வேட்புமனுக்களை பெற்று சமர்ப்பிக்குமாறு அறிவிக்கப்பட்டுள்ளது.
சென்னை தலைமைச் செயலகத்தில் உள்ள தேர்தல் அதிகாரிகள் அறையில் மே 31ஆம் தேதி மாலை 3 மணி வரை வேட்புமனுக்கள் ஏற்றுக்கொள்ளப்படும். ஜூன் 1ஆம் தேதி வேட்புமனு பரிசீலனை. வேட்புமனுக்களை திரும்பப் பெறுவதற்கான கடைசி நாள் ஜூன் 3.
ஆறு இடங்களுக்கு ஆறு பேர் மட்டும் வேட்புமனுத் தாக்கல் செய்தால் தேர்தலுக்கு அவசியம் இருக்காது. அதிகமானோர் மனுத்தாக்கல் செய்தால் ஜூன் 10 காலை 9 மணி முதல் மாலை 4 மணி வரை வாக்குப்பதிவு நடைபெறும். மாலை 5 மணிக்கு மேல் வாக்கு எண்ணிக்கை நடைபெறும்.
தமிழகத்தில் கடந்த ஆண்டு நடைபெற்ற சட்டமன்றத் தேர்தலுக்குப் பிறகு அதிமுகவின் பலம் குறைந்து, திமுகவின் பலம் அதிகரித்துள்ளது. அதனால், நடைபெறவுள்ள தேர்தலில், அதிமுகவிடம் உள்ள 3 இடங்களில் ஒன்று திமுக வசம் செல்கிறது. அந்த ஒன்றை தனது கூட்டணிக் கட்சியான காங்கிரசுக்கு திமுக ஒதுக்கியுள்ளது. திமுக கூட்டணியைச் சேர்ந்த நால்வருக்கு மாநிலங்களவை உறுப்பினர் பதவி கிடைக்கும்.
திமுக வேட்பாளர்களாக தஞ்சை சு.கல்யாணசுந்தரம், கே.ஆர்.என். ராஜேஸ்குமார், இரா.கிரிராஜன் ஆகியோர் கடந்த வாரமே அறிவிக்கப்பட்டுவிட்டனர். அதிமுக வேட்பாளர்களாக யாரை நிறுத்துவது என்பதில் அக்கட்சித் தலைமை திணறி வருகிறது. அதேபோல திமுக கூட்டணிக் கட்சியான காங்கிரசின் ஒரு வேட்பாளர் யார் என்பதைத் தேர்வு செய்வதில் நேற்று மாலை வரை இழுபறி நீடித்தது.
வேட்பாளர்களை தேர்வு செய்வதில் அதிமுக, காங்கிரஸ் திணறல்