மாணவர் முரசு
இ-பேப்பர்
மக்களுக்கு நன்கு அறிமுகமான 'கோல்டு ஸ்டோரேஜ்', 'டோஸ்ட்டு பாக்ஸ்', 'சிங்டெல்' போன்ற வர்த்தகங்கள் உட்பட, 1,000க்கும் மேற்பட்ட இடங்களில் பொருள் வாங்குவோர் புள்ளிகள் பெறுவதற்கான புதிய வெகுமதித் திட்டம் இன்றுமுதல் தொடங்குகிறது.
'யூ ரிவார்ட்ஸ் கிளப்' என்ற இப்புதிய திட்டத்தை தெமாசெக் நிறுவனத்தின் மிண்டன்.ஏஐ பிரிவும் அதன் உத்திபூர்வ பங்காளியான 'டிஎஃப்ஐ' வர்த்தகக் குழுமமும் இணைந்து தொடங்கியுள்ளன.
திட்டத்தின் மூலம் 'யூ' (yuu) பங்காளி வர்த்தகங்களிடமிருந்து வாடிக்கையாளர்கள் புள்ளிகளை மேலும் வசதியாகவும் துரிதமாகவும் சேகரிக்க முடியும்.
புள்ளிகளைச் சேகரித்த பின்பு, கட்டமைப்பில் உள்ள சில்லறை வர்த்தகத்திடமிருந்து வாடிக்கையாளர் சலுகைகளையும் வெகுமதிகளையும் பெறலாம்.
இதன்படி, 200 'யூ' புள்ளிகளைக் கொண்டு வாடிக்கையாளர்கள் தங்களின் பொருட்களில் $1 கழிவு பெறலாம்.
திட்டத்தில் சேர விரும்புவோர் 'யூ' செயலியைப் பதிவிறக்கம் செய்து தங்கள் பெயரில் புதிய கணக்கைப் பதிவு செய்ய வேண்டும். பின்னர் திட்டத்தில் இணைந்துள்ள வர்த்தகங்களில் கட்டணம் செலுத்தும்போது 'யூ' கியூஆர் குறியீட்டைக் காசாளரிடம் காண்பிக்க வேண்டும்.
செலவு செய்யும் ஒவ்வொரு வெள்ளிக்கும் ஒரு புள்ளி வழங்கப்படும். புதிய வெகுமதித் திட்டத்தின் தொடர்பில் 'டிபிஎஸ்' வங்கி புதிதாக கடன் அட்டை ஒன்றையும் அறிமுகம் செய்துள்ளது. 'டிபிஎஸ் யூ' அட்டையைப் பயன்படுத்துவோரால் மேலும் விரைவாகப் புள்ளிகள் சேகரிக்க முடியும்.
'பேஷன்' அட்டை அல்லது 'பேஷன் பிஓஎஸ்பி' பற்று அட்டையை வைத்திருப்போரும் தளத்துடன் தங்களின் அட்டைகளை இணைத்துக்கொள்ளலாம்.
தற்போதைய பொருளியல் சூழலில் இதுபோன்ற வெகுமதித் திட்டங்களில் சேர்ந்து பணம் சேமிக்க விரும்புவதாக மிண்டன்.ஏஐ நடத்திய அண்மைய ஆய்வு ஒன்றில் 60% சிங்கப்பூரர்கள் தெரிவித்திருந்தனர்.