மாணவர் முரசு
இ-பேப்பர்
ஈரோடு: இம்மாதம் 27ஆம் தேதி நடைபெற இருக்கும் ஈரோடு கிழக்குத் தொகுதி இடைத்தேர்தலில் 80க்கும் மேற்பட்டவர்கள் போட்டி
யிடும் சூழல் நிலவுவதால் ஒவ்வொரு பூத்திலும் 3 அல்லது 4 வாக்குப் பதிவு இயந்திரங்களை வைக்கும் நிலை ஏற்பட்டுள்ளது. ஒரு வாக்கு இயந்திரத்தில் 16 பேரின் பெயர் மற்றும் சின்னத்தை மட்டுமே பதிவு செய்யமுடியும். வேட்புமனுக்கள் பரிசீலனைக்குப் பின்னர் 83 மனுக்கள் ஏற்றுக்கொள்ளப்பட்டு உள்ளன.
அதிமுக வேட்பாளர் தென்னரசு, காங்கிரஸ் வேட்பாளர் ஈவிகேஎஸ் இளங்கோவன், தேமுதிக வேட்பாளர் ஆனந்த், நாம் தமிழர் கட்சி வேட்பாளர் மேனகா நவநீதன் ஆகியோரின் மனுக்களும் ஏற்றுக்கொள்ளப்பட்டுள்ளன. இதன்மூலம் இன்றைய நிலவரப்படி 83 பேர் போட்டியில் உள்ளனர். வேட்புமனுக்களைத் திரும்பப் பெற இன்று (பிப்ரவரி 10) பிற்பகல் 3 மணி வரை காலக்கெடு அறிவிக்கப்பட்டு உள்ளது. இதன் பிறகு சுயேச்சை வேட்பாளர்களுக்கான சின்னங்கள் ஒதுக்கீடு செய்யப்படும்.
இந்நிலையில், இந்த முறை இந்தத் தொகுதியின் வெற்றியை நிர்ணயிப்பவர்களில் வடமாநிலத்தவர்கள் முக்கிய இடம்பெற்று உள்ளனர். காவிரிக்கரையோர தொகுதியாக ஈரோடு கிழக்குத் தொகுதி இருக்கிறது. வடமாநிலத்தவர்கள் பெரும்பாலும் மின்பொருள் கடை மற்றும் துணிக்கடைகளை அதிக அளவில் வைத்துள்ளனர். வடமாநில வாக்காளர்கள் மட்டும் இந்தத் தொகுதியில் 7,000 பேருக்கு மேல் உள்ளனர்.
கடந்த முறை திமுக கூட்டணியில் போட்டியிட்ட காங்கிரஸ் வேட்பாளர் திருமகன் ஈவேரா, அதிமுக கூட்டணியில் நின்ற தமாகா வேட்பாளர் எம்.யுவராஜாவைக் காட்டிலும் ஏறக்குறைய 8,900 வாக்குகள் வித்தியாசத்தில் வெற்றி பெற்றார்.
தற்போது இரட்டை இலைச் சின்னத்துடன், பாஜக ஆதரவுடன் அதிமுக களம் இறங்கி உள்ளது. பொதுவாக வடமாநிலத்தவர்கள் பாஜக ஆதரவு நிலையைக் கொண்டவர்கள். அவர்களின் வாக்குகளைப் பெற அதிமுக கூட்டணிக் கட்சியினரைக் காட்டிலும் திமுகவினர் பெருமுயற்சி எடுத்து வருகின்றனர்.
ஈரோடு கிழக்குத் தொகுதியில் கருங்கல்பாளையம் பகுதியில் அமைச்சர் தங்கம் தென்னரசு வடமாநிலத்தவர்களின் வீடுகளை அடையாளம் கண்டு ஒவ்வொரு வீடாகச் சென்று காங்கிரஸ் வேட்பளாருக்கு ஆதரவு திரட்டினார். குறிப்பாக, அந்தப் பகுதியில் ஜவுளித் தொழிலில் ஈடுபட்டு இருப்போரைச் சந்தித்து அவர்களின் பிரச்சினைகளைக் கேட்டறிந்த தங்கம் தென்னரசு, திமுக கூட்டணி வேட்பாளருக்கு வாக்களிக்குமாறு கேட்டுக்கொண்டார்.
83 வேட்பாளர்களின் மனு ஏற்பு; ஒவ்வொரு பூத்திலும் 4 வாக்குப் பதிவு இயந்திரங்கள்