பிப்ரவரி 3ஆம், 4ஆம் தேதிகளில் தொகுதி பங்கீடு குறித்து திமுக பேச்சுவார்த்தை

சென்னை: அடுத்த வாரத்துக்குள் கூட்டணிக் கட்சிகளுடன் தொகுதி பங்கீட்டை முடிக்க திமுக முடிவு செய்துள்ளது. இதையடுத்து, பிப்ரவரி 3ஆம், 4ஆம் தேதிகளில் மதிமுக, கம்யூனிஸ்ட் மற்றும் விசிக கட்சிகளுடன் பேச்சுவார்த்தை நடத்த திட்டமிட்டுள்ளது.

மத்திய அரசின் பட்ஜெட் தாக்கலைத் தொடர்ந்து நாடாளுமன்ற தேர்தல் எப்போது வேண்டுமானாலும் அறிவிக்கப்படலாம் என்ற எதிர்பார்ப்பு நிலவுகிறது. இந்தச் சூழலில், அரசியல் கட்சிகள் கூட்டணி, தொகுதி பங்கீட்டில் கவனம் செலுத்தி வருகின்றன. தமிழகத்தில் இண்டியா கூட்டணியில் உள்ள திமுக, காங்கிரஸ் கட்சிகள் முதல் கட்ட பேச்சுவார்த்தையை கடந்த ஜனவரி 28ஆம் தேதி முடித்துவிட்ட நிலையில், அடுத்தகட்டமாக வரும் பிப்ரவரி 9ஆம் தேதி பேச திட்டமிட்டிருந்தன.

இந்நிலையில், நாளை ஜனவரி 31ஆம் தேதி நாடாளுமன்றம் கூடுகிறது. மறுநாள் பிப்ரவரி1ஆம் தேதி மத்திய அரசின் பட்ஜெட் தாக்கல் செய்யப்பட உள்ளது. இக்கூட்டத்தொடரில், திமுக தொகுதி பங்கீட்டுக்குழு தலைவர் டி.ஆர்.பாலு மற்றும் உறுப்பினர்கள் பங்கேற்க வேண்டியுள்ளதால், வரும் பிப்ரவரி 2ஆம் தேதி வரை பேச்சுவார்த்தைக்கு யாரும் அழைக்கப்படவில்லை. பிப்ரவரி 3ஆம் தேதிக்குப்பின் கூட்டணி கட்சிகளுடன் தொடர்ந்து பேச்சுவார்த்தை நடத்த திமுக திட்டமிட்டுள்ளது.

அதன்படி, பிப்ரவரி 3ஆம் தேதி இந்திய கம்யூனிஸ்ட் கட்சி சார்பில் சுப்பராயன் எம்.பி., முன்னாள் எம்எல்ஏ பழனிசாமி, மாநில துணைச் செயலாளர் மு.வீரபாண்டியன் ஆகியோர் கொண்ட குழு திமுகவுடன் தொகுதி பங்கீடு குறித்து பேசுகிறது. மறுநாள் பிப்ரவரி 4ஆம் தேதி மார்க்சிஸ்ட் கம்யூனிஸ்ட் கட்சிக் குழுவுடனும், அன்று மாலை மதிமுகவுடனும் தொகுதி பங்கீடு குறித்து பேச்சுவார்த்தை நடத்தப்பட உள்ளது.

இதைத்தொடர்ந்து விசிக, ஐயுஎம்எல் உள்ளிட்ட கூட்டணிக் கட்சிகளுடன் பேச திமுக திட்டமிட்டு அதற்கான பணிகளில் ஈடுபட்டுள்ளது. குறிப்பாக, இந்தமுறையும் கம்யூனிஸ்ட் கட்சிகள், மதிமுக, விசிகவுக்கு தலா இரண்டு இடங்கள் ஒதுக்க திமுக திட்டமிட்டுள்ளதாக கூறப்படுகிறது. இதுதவிர மக்கள் நீதி மய்யம் கட்சிக்கும் இம்முறை திமுகவில் தொகுதி ஒதுக்கப்பட உள்ளது.

முதல்வர் மு.க.ஸ்டாலின், வெளிநாட்டுப் பயணத்தை முடித்துக் கொண்டு வரும் பிப்ரவரி 7ஆம் தேதி சென்னை திரும்புகிறார். தொடர்ந்து பிப்ரவரி 9ஆம் தேதி காங்கிரஸ் கட்சியுடன் திமுக பேசுகிறது. அன்றே அனைத்து தொகுதி பேச்சுவார்த்தையையும் முடித்துக் கொண்டு, தொகுதிப் பட்டியலை வெளியிடவும் திட்டமிட்டுள்ளதாகக் கூறப்படுகிறது.