தமிழகத்தில் அதிமுக அல்லது திமுக மட்டுமே ஆட்சி செய்யவேண்டும்: ராஜேந்திர பாலாஜி

அதிமுக முன்னாள் அமைச்சர் கே.டி.ராஜேந்திர பாலாஜி, சிவகாசியில் நடைபெற்ற வாக்குச்சாவடி முகவர்களுக்கான பயிற்சி முகாமில் பேசும்போது, தமிழக அரசியலில் அதிமுக அல்லது திமுக ஆகிய இரண்டு கட்சிகளுக்கு மட்டுமே முக்கியத்துவம் உண்டு என்றும், மற்ற கட்சிகளுக்கு வேலை இல்லை என்றும் வலியுறுத்தினார்.

தமிழகத்தில் திமுக, அதிமுக இரண்டும்தான் பலமான கட்சிகள். வேறு கட்சிக்கு இங்கு வேலை கிடையாது. ஒன்று, அதிமுக ஆள வேண்டும் அல்லது திமுக ஆள வேண்டும். முதல்வர் மு.க.ஸ்டாலின் தன்னைப் பற்றியும் தன் குடும்பத்தைப் பற்றியும் மட்டுமே சிந்திப்பதாகக் குற்றம் சாட்டினார்.

சாட்சியாபுரம், திருத்தங்கல், சாத்தூர் ரயில்வே மேம்பாலங்களுக்கு மத்திய அரசின் அனுமதியைப் பெற்று அரசாணை வெளியிட்டது அதிமுக அரசு என்று கூறினார்.

‘மத்தியில் இருப்பது உங்கள் ஐயா அல்ல. எங்கள் டாடி மோடி’ என்று குறிப்பிட்டு, தற்போதைய திமுக அரசால் மத்திய அரசிடம் அனுமதி பெற முடியாது என்று சவால் விடுத்தார்.

விருதுநகர் எம்.பி. மாணிக்கம் தாகூர், மாவட்டத்திற்கு எதுவும் செய்யவில்லை என்றும், ‘ஆட்டுக்கு தாடியும் நாட்டுக்கு காங்கிரஸ் கட்சியும் தேவையில்லை’ என்றும் கடுமையாக விமர்சித்தார்.

அதிமுக ஆட்சியில் ஏதாவது ஓர் இடத்தில் தவறு நடந்திருக்கலாம். ஆனால், திமுக ஆட்சியில் தவறுகள் மட்டுமே நடக்கின்றன என்று ஒப்பீடு செய்தார்.

திமுக அரசு தென் மாவட்டங்களுக்கு நிதி ஒதுக்காமல் வஞ்சிக்கிறது என்று குற்றம் சாட்டினார்.

மத்திய அரசோடு இணக்கமாக இருந்து அதிக திட்டங்களைப் பெற அதிமுக வெற்றி பெற வேண்டும் என்றும் பழனிசாமி முதல்வராகப் பதவியேற்கும்போது, தான் அருகில் இருப்பதாகவும் சிவகாசி தொகுதிக்கு பல திட்டங்களைக் கொண்டு வரப்போவதாகவும் உறுதியளித்தார்.