எதைப் பற்றியும் கவலைப்படாமல் பணியாற்றுங்கள்: ஸ்டாலின்

1 mins read
77e4785f-9007-4b64-ab78-265f6504a961
சென்னையில் நடந்த திமுக சட்டமன்றத் தொகுதி பார்வையாளர்கள் கூட்டத்தில் அக்கட்சியின் தலைவரும் தமிழக முதல்வருமான மு.க.ஸ்டாலின் உரையாற்றினார். - படம்: தி இந்து

சென்னை: “தமிழக மக்களிடம் கலைஞர் மகளிர் உரிமைத்தொகை நல்ல முறையில் சென்றடைந்துள்ளது. உங்கள் தொகுதியில் வேறு ஏதாவது பிரச்சினைகள் இருந்தாலும், உடனடியாக கட்சித் தலைமைக்குத் தெரியப்படுத்துங்கள். எதைப் பற்றியும் கவலைப்படாமல், உங்களுக்கு என்று கொடுக்கப்பட்டுள்ள பணிகளைச் செய்யுங்கள். மற்றதை நாங்கள் பார்த்துக்கொள்கிறோம்,” என்று திமுக சட்டமன்றத் தொகுதி பார்வையாளர்கள் கூட்டத்தில் தமிழக முதல்வர் மு.க.ஸ்டாலின் பேசியுள்ளார்.

சென்னை அண்ணா அறிவாலயத்தில் திமுக தலைவர் மு.க.ஸ்டாலின் தலைமையில், 2026 சட்டமன்றத் தேர்தல் பணிகளை மேற்கொள்ளும் வகையில் நியமிக்கப்பட்டுள்ள சட்டமன்றத் தொகுதி பார்வையாளர்கள் ஆலோசனைக் கூட்டம் திங்கட்கிழமை அன்று (அக்டோபர் 28) நடைபெற்றது. இந்தக் கூட்டத்தில் கட்சியின் பொதுச் செயலாளர் துரைமுருகன், பொருளாளர் டி.ஆர்.பாலு, முதன்மைச் செயலாளர் கே.என்.நேரு, துணைப் பொதுச் செயலாளர்கள், திமுக தலைமைக்கழக நிர்வாகிகள் கலந்துகொண்டனர்.

சட்டமன்றத் தொகுதி பார்வையாளர்கள் கூட்டத்தில் பேசிய முதல்வர் ஸ்டாலின், “தொகுதிப் பார்வையாளார்கள் நியமிக்கப்பட்டு விட்டதால் தேர்தலில் போட்டியிட சீட் கிடைக்கவில்லை என்று கவலைப்பட வேண்டாம். உங்களுக்கும் வாய்ப்பு வழங்கப்படும்,” என்றார்.

முன்னதாக, வரும் 2026 சட்டமன்றத் தேர்தலில் திமுக 200 தொகுதிகளில் வெற்றிபெற வேண்டும் என்ற இலக்கு நிர்ணயித்துள்ளது. இதற்காகத் துணை முதல்வர் உதயநிதி தலைமையில் தேர்தல் ஒருங்கிணைப்புக் குழுவும் அமைக்கப்பட்டுள்ளது.

குறிப்புச் சொற்கள்