மாணவர் முரசு
இ-பேப்பர்
ஜார்ஜ் டவுன்: மலேசியாவின் பினாங்கு பாலத்தில் கார் ஓட்டுநர் ஒருவர் வாகனத்தின் கட்டுப்பாட்டை இழந்த நிலையில் அது குப்புறக் கவிழ்ந்துவிட்டது.
இச்சம்பவம் மார்ச் 2ஆம் தேதி காலை நடந்தது.
பினாங்கு தீவிலிருந்து பெருநிலம் நோக்கிச் சென்றுகொண்டிருந்த கார், சாலைத் தடுப்பை மோதியதில் 10க்கும் மேற்பட்ட தடுப்புக் கம்பங்கள் தூக்கி எறியப்பட்டதாகக் கூறப்படுகிறது.
விபத்தால் போக்குவரத்து மெதுவடைந்ததுடன் கிட்டத்தட்ட இரண்டு மணிநேரத்திற்கு நெரிசல் நீடித்தது.
விபத்து காரணத்தால் பினாங்கு பாலத்தின் வலது, நடு வழித்தடங்கள் மூடப்பட்டுள்ளதாக ‘எக்ஸ்’ தளத்தில் போக்குவரத்துத் தகவல் வெளியிடப்பட்டது.
இதையடுத்து, தொழிற்சாலைப் பேருந்து ஒன்று சாலை வழித்தடம் மாறிய காரணத்தால் விபத்து நேர்ந்ததாக அதிகாரிகள் பின்னர் கண்டறிந்தனர்.
நடு வழித்தடத்திலிருந்து வலது வழித்தடத்திற்குப் பேருந்து மாறியபோது வலது வழித்தடத்தில் தம் வாகனத்தை 46 வயது மாது ஒருவர் ஓட்டி வந்ததாகவும் பேருந்தின் பின்புறத்தில் மோதியதாகவும் ஜார்ஜ் டவுன் காவல்துறை தெரிவித்தது.
மோதிய தாக்கத்தால் கார் அதன் கட்டுப்பாட்டை இழந்து பாலத்தின் எதிர்த்தடத்திற்குச் சென்றுவிட்டது.
தொடர்புடைய செய்திகள்
கார் ஓட்டுநருக்கும் அவரின் 58 வயது பயணிக்கும் சிறு காயங்கள் ஏற்பட்டன. அத்துடன் 53 வயது பேருந்து ஓட்டுநருக்குக் காயம் ஏதும் இல்லை.
மற்றொரு சம்பவத்தில், அதே நாளன்று பினாங்கு பாலத்தில் இரண்டு மோட்டார்சைக்கிள்கள் மோதிக்கொண்டதால் 71 வயது மோட்டார்சைக்கிளோட்டி ஒருவர் கொல்லப்பட்டார்.
வெளிநாட்டவரான அந்த மற்றொரு மோட்டார்சைக்கிளோட்டி காயங்களுடன் பினாங்கு மருத்துவமனைக்குக் கொண்டு செல்லப்பட்டதாக ‘த ஸ்டார்’ தெரிவித்துள்ளது.